លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ បានបញ្ជាឲ្យសមត្ថកិច្ចទាំងអស់កុំសហការជាមួយស្ថាប័នមីក្រូហិរញ្ញវត្ថុមួយចំនួនដែលលោកថាមានចេតនាមិនល្អឲ្យប្រជាពលរដ្ឋទៅខ្ចីប្រាក់ហើយទៅរឹបអូសផ្ទះសម្បែងដីធ្លីរបស់ប្រជាពលរដ្ឋ។
ក្នុងសន្និសីទជាតិស្តីពីការអភិវឌ្ឍវិស័យមីក្រូហិរញ្ញវត្ថុនៅកម្ពុជា លោក ហ៊ុន សែន មានប្រសាសន៍ថាស្ថាប័នអង្គការសមាគមមិនមែនរដ្ឋាភិបាលមួយចំនួនបានដើរតួនាទីជាគ្រឹះស្ថានមីក្រូហិរញ្ញវត្ថុឲ្យប្រជាពលរដ្ឋសងប្រាក់កម្ចីមានលក្ខណៈកេងបន្លំ កេងប្រវ័ញ្ច មាននីតិវិធីនៃការខ្ចីប្រាក់មានភាពធូររលុងនិងឆាប់រហ័ស។ លោកបន្តថាអង្គការទាំងនោះមានចេតនាចង់រឹបអូសទ្រាំសម្បត្តិបញ្ចាំរបស់ប្រជាពលរដ្ឋ។ លោកមានប្រសាសន៍ថា៖ “កន្លងទៅនេះ ការធ្វើសកម្មភាពឯកឯងរបស់អង្គការមួយចំនួន ដែលមុននេះគឺជាអង្គការក្រៅរដ្ឋាភិបាល ប៉ុន្តែប្រែក្លាយខ្លួនទៅជាមីក្រូហិរញ្ញវត្ថុ។ ហើយអ្នកទាំងនោះ កន្លែងខ្លះ ហាក់ដូចជាមានចេតនាតែម្តង។ ឧទាហរណ៍ធម្មតា គោលការណ៍សម្រាប់ការឲ្យខ្ចី យើងតែងតែដឹងថាតើគេមានសមត្ថភាពសងឬអត់។ នេះជាបញ្ហាសំខាន់។ ហើយយកទៅហ្នឹង ទៅបម្រើគោលដៅនៃការផលិតឬយ៉ាងណា?.. ប៉ុន្តែនេះអត់ទេ ហាក់ដូចជាមានចេតនាដើម្បីរឹបអូសយកផ្ទះសម្បែងនិងដីធ្លីតែម្តង តាមរយៈភាពធូររលុងក្នុងការឲ្យខ្ចី។ ជួនកាលខ្ចី យកទៅទិញម៉ូតូជិះលេង។ ដល់ជិះលេងទៅ វាមានលទ្ធភាពសងមកពីកាល។ ដល់ពេលកំណត់ គឺចាប់ផ្តើមរឹបអូសយកផ្ទះ សម្បែងដីធ្លីតែម្តង”។
លោក ហ៊ុន សែន បន្តថាស្ថាប័នមីក្រូហិរញ្ញវត្ថុមួយចំនួន ដែលលោកថាឲ្យប្រជាពលរដ្ឋយកលុយមកដាក់ឲ្យមានអត្រាការប្រាក់ក្នុងមួយខែទៅដល់១២ភាគរយ។ លោកចាត់ទុកថានេះជា”វិធីបោកមួយ”ដោយលោកអំពាវនាវឲ្យប្រជាពលរដ្ឋត្រូវប្រុងប្រយ័ត្ន។ លោកនាយករដ្ឋមន្រ្តីបញ្ជាកុំឲ្យសមត្ថកិច្ចសហការជាមួយស្ថាប័នមីក្រូហិរញ្ញវត្ថុដែលលោកថាមានបំណងរឹបអូសដីធ្លីរបស់ប្រជាពលរដ្ឋ។ លោកបញ្ជាឲ្យត្រួតពិនិត្យលើស្ថាប័នមីក្រូហិរញ្ញវត្ថុទាំងនេះ។
លោក ហ៊ុន សែន មានប្រសាសន៍ថា៖ “ឥឡូវប៉ូលិសមកច្រើនណាស់ កុំពូកែរឿងទៅគាំទ្ររឹបអូសផ្ទះ ដី។ករណីតុលាការរឿងមួយ តែករណីគ្រាន់តែពួកម្ចាស់ហិរញ្ញវត្ថុ ស្នើឲ្យទៅជួយ កុំ។ កុំរពិសដៃពេក លោកប៉ូលិស។ ប៉ុន្តែមករពិសខាងអាចេះវិញ បងប្អូនអើយ ពេលណាខ្ញុំឈ្នះ មិនបាច់សងប្រាក់ទេ។ ចាប់ភ្លាមហ្មង។ អាហ្នឹង វាលេងខូចម្ល៉េះ ខូចអញ្ចឹងរន្ទះបាញ់អ្ហេ”។
កាលពីថ្ងៃទី៩ ខែកុម្ភៈ ឆ្នាំ២០១៥ ក្រសួងមហាផ្ទៃបានបង្ហាញរបាយការណ៍មួយថា ប្រជាពលរដ្ឋខ្មែរទូទាំងប្រទេសខ្ចីប្រាក់ពីមីក្រូហិរញ្ញវត្ថុប្រហែល៣៥០០លានដុល្លារអាមេរិក ។ របាយការណ៍បញ្ជាក់ទៀតថាមានស្ថាប័នមិនស្របច្បាប់មួយចំនួនយកការប្រាក់ខ្ពស់ពេកដែលនាំឲ្យពលរដ្ឋក្រីក្រខ្ចីប្រាក់ហើយគ្មានប្រាក់សងត្រូវរឹបអូសផ្ទះសម្បែង៕