ប្រជាពលរដ្ឋមួយចំនួននៅរាជធានីភ្នំពេញ បានបង្ហាញការធុញនឹងសំឡេងរោទ៍ Call Tunes នៅក្នុងទូរសព្ទដៃ ដែលថា “មីក្រូហិរញ្ញវត្ថុជារបស់ឯកជន មិនមែនជារបស់រដ្ឋ”។
សំឡេងរោទ៍ Call Tunes ក្នុងទូរសព្ទដៃនេះ ត្រូវបានដាក់ឲ្យប្រើប្រាស់ទៅតាមការបញ្ជារបស់នាយករដ្ឋមន្រ្តី ដោយថាដើម្បីកុំឲ្យពលរដ្ឋយល់ច្រឡំថា ពលរដ្ឋជំពាក់លុយរដ្ឋតទៅទៀត។
លើសពីនេះទៀត កាលពីពេលថ្ងៃទី១០ មីនា នេះ និយ័តករទូរគមនាគមន៍កម្ពុជា បានរំឭកក្រុមហ៊ុនទូរសព្ទទាំងអស់ ត្រូវបង្កើនបច្ចេកទេស កុំឲ្យអតិថជនរបស់ខ្លួន អាចលុបចេញបាន នូវសារជាសំឡេងក្នុងទូរសព្ទដៃ ខណៈអតិថិជនមួយចំនួនបានលុបសារនេះដោយខ្លួនឯង និងតេប្រាប់ក្រុមហ៊ុនឲ្យបិទចោល ដោយសារតែពួកគេធុញទ្រាន់។
និស្សិតនៅសាលាឯកជន កញ្ញា ព្រឿង រចនា បានរៀបរាប់ប្រាប់អ្នកយកព័ត៌មានថា ជារៀងរាល់ថ្ងៃ នាងមានការធុញទ្រាន់ នៅពេលទូរសព្ទម្តងៗ ដោយឮសំឡេងថា“មីក្រូហិរញ្ញវត្ថុជារបស់ឯកជន មិនមែនជារបស់រដ្ឋ។កញ្ញានិយាយថា «ពេលឮដដែលៗធុញហើយមានអារម្មណ៍ថាដូចរំខាន ដដែលៗនិយាយរហូត ហើយពេលខ្លះមួម៉ៅដែរ ដ៏ពេលដាក់រាល់ថ្ងៃ រយៈពេលមួយឆ្នាំយូរ ហើយធុញទ្រាន់»។
កញ្ញា រចនា បានបញ្ជាក់ទៀតថា ក្រុមហ៊ុនគួរតែដាក់សំឡេង Call Tunes ក្នុងទូរសព្ទដៃ តែរយៈពេល៣ខែបានហើយ ជាជាងដាក់រហូតដល់មួយឆ្នំាពេញតាមការចង់របស់របស់លោកនាយករដ្ឋមន្ត្រី ហ៊ុន សែន ដោយគាត់យល់ថា បើពលរដ្ឋបានឮសារនោះតែមួយដង ក៏អាចយល់ពីសារខ្លឹមសារនោះផងដែរ។
អាជីវករលក់ដូរម្តុំផ្សារអូឬស្សីអ្នកនាង លាង ហេង បានឲ្យដឹងថា នៅពេលគាត់ទាក់ទងទៅម៉ូយឲ្យយកសម្ភារៈលក់ គឺឮតែសំឡេងរំខាននេះមិនតិចជាង១០ដងទេក្នុងមួយថ្ងៃ។ ករណីនេះអ្នកនាងថា ជារំលោភសិទ្ធិឯកជន។ អ្នកនាងនិយាយថា «ពេលចឹងដូចគាត់[ក្រុមហ៊ុនទូរសព្ទ] រំលោភសិទ្ធិយើង ពេលយើងអត់ចង់ដាក់ផង ហើយគាត់តម្រូវឲ្យយើងដាក់ទំាងអស់ ប៉ះពាល់អារម្មណ៍ដូចជា រំលោភសិទ្ធិឯកជនរបស់ខ្លួនយើងផ្ទាល់»។
អ្នកនាង ហេង ថាជំរើសល្អរដ្ឋាភិបាលគួរតែបើកសិទ្ធិសេរីភាពឲ្យប្រជាពលរដ្ឋមានសិទ្ធិសម្រេចថា ដាក់ឬមិនដាក់សំឡេង Call Tunes ក្នុងទូរសព្ទដៃរបស់ខ្លួនបាន ដោយថាដើម្បីកុំឲ្យពលរដ្ឋមួយចំនួនធុញទ្រាន់នឹងសំឡេងCall Tunes នោះ។
ទឹកមុខមុតមំា ឈរក្បែរចិញ្ចើមផ្លូវ លោក ខៀវ សារ៉ាត់ បាននិយាយថា ពេលខ្លះគាត់ចង់កាច់ស៊ីមទូរសព្ទចោលដែរ តែខ្លាចមិនមានអ្វីប្រើ។ លោកនិយាយថា «ធុញ ធុញ ធុញ ដ៏មែនទែន ដ៏ពេលថ្ងៃខ្លះ ខ្ញុំតេទៅក្រុមហ៊ុនឲ្យគេបិទចោល ហើយគេក៏ប្រាប់ឲ្យបិទចោល ប៉ុន្តែបិទតែរបស់យើង ប៉ុន្តែយើងតេទៅលេខអ្នកផ្សេងទៀតមិនដឹងថាប្រាប់គេយ៉ាងម៉េច គេនៅតែឮ មីក្រូហិរញ្ញវត្ថុជារបស់ឯកជន មិនមែនជារបស់រដ្ឋ មួយថ្ងៃៗដូចធុញ ខ្ញុំធុញដូចថាថ្ងៃខ្លះ ខ្ញុំតេទៅក្រុមហ៊ុនចង់កាច់ស៊ីមចោល ប៉ុន្តែកាច់ទៅមិនដឹងថាអត់អីប្រើ ចេះតែទុកប្រើសិនទៅ»។
តាមអ្នកយកព័ត៌មានចុះសម្ភាសន៍ប្រជាពលរដ្ឋចំនួន២០នាក់ ក្នុងនោះមាន១៨នាក់បានអះអាងប្រហាក់ប្រហែលគ្នាថា ពួកគេមិនពេញចិត្តនិងសំឡេងរោទ៍ Call Tunes ក្នុងទូរសព្ទដៃនោះទេ ដោយពួកគេស្នើទៅរដ្ឋាភិបាលបញ្ជាទៅក្រុមហ៊ុនទូរសព្ទទំាងអស់បិទសំឡេងរោទ៍ Call Tunes នោះ។
អង្គុយលើម៉ូតូកងបីរង់ចំាដឹកភ្ញៀវបរទេសម្តុំមាត់ទន្លេ សុខ រតនៈ បាននិយាយថា នៅពេលដែលភ្ញៀវតេហៅគាត់ឲ្យទៅឌុប ឮសូរសំឡេង Call Tunes នេះ ក៏មានការងឿងឆ្ងល់ដែរ។ ករណីនេះលោកស្នើទៅ រដ្ឋាភិបាលបញ្ជាទៅក្រុមហ៊ុនទូរសព្ទឈប់ដាក់សំឡេង Call Tunes ក្នុងទូរសព្ទដៃទៀត។ លោកស្នើថា «ចិត្តខ្ញុំមិនចង់ឲ្យរំខានទេ ព្រោះយើងមានប្រព័ន្ធផ្សព្វផ្សាយគ្រប់កន្លែងគេដឹងអស់ហើយ ចំបាច់ដាក់ក្នុងប្រព័ន្ធទូរសព្ទធ្វើអ្វី ហើយនៅពេលខលទៅឮសូរសំឡេងហ្នឹងដដែលរាល់ថ្ងៃ ទទួលយកអត់បាន»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ យល់ថា ការដាក់សំឡេង(Call Tunes) “មីក្រូហិរញ្ញវត្ថុជារបស់ឯកជន មិនមែនជារបស់រដ្ឋ“ តាមការចង់បានរបស់លោក ហ៊ុន សែន លោកថា ធ្វើឲ្យពលរដ្ឋមួយចំនួនមានការធុញទ្រាន់ និងរំលោភសិទ្ធិឯកជន។ លោកបញ្ជាក់ថា មុនដាក់សំឡេង(Call Tunes) ក្រុមហ៊ុនគួរតែសុំយោបល់ពីអ្នកប្រើប្រាស់សេវាទូរសព្ទទំាងនោះជាមុនសិន។
ករណីនេះលោកមេធាវី សំ សុគង់ ពន្យល់តាមនីតិវិធីច្បាប់ថា ករណីអ្នកប្រើប្រាស់សេវារបស់ក្រុមហ៊ុនទូរសព្ទ ហើយត្រូវបានម្ចាស់ក្រុមហ៊ុនដាក់សំឡេង (Call Tunes)ក្នុងទូរសព្ទ ដែលអ្នកប្រើមិនពេញចិត្ត លោកថា ជាការរំលោភច្បាប់។ ករណីនេះលោកថា បើអ្នកប្រើប្រាស់សេវាយល់ថា សំឡេងនោះនាំឲ្យរំខាននិងប៉ះពាល់អារម្មណ៍ខ្លំាង ពួកគេមានសិទ្ធិប្តឹងទៅតុលាការ និងស្ថាប័នពាក់ព័ន្ធ ឲ្យលុបសំឡេង(Call Tunes)នោះចេញបាន។
បន្ទាប់ពីលោក ហ៊ុន សែន បញ្ជាឲ្យក្រុមហ៊ុនទូរសព្ទដាក់សំឡេង Call Tunes ក្នុងទូរសព្ទដៃនិងតាមទូរសទស្សន៍ថា “មីក្រូហិរញ្ញវត្ថុជារបស់ឯកជន មិនមែនជារបស់រដ្ឋ“ នោះក៏មានប្រតិកម្មជាច្រើនតាមហ្វេសប៊ុក ដោយអ្នកខ្លះនិយាយថតជាវីដេអូ ធ្វើត្រាប់តាម និងប្រើពាក្យបែបឌឺដង និងសើចចំអកទៀតផង។
ខណៈមានការរិះគន់តាមហ្វេសប៊ុកបែបនេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានចេញមុខអះអាងថា លោកនឹងស្នើទៅលោក ហ៊ុន សែន អន្តរាគមន៍ទៅក្រុមហ៊ុនទូរសព្ទ និងប្រព័ន្ធផ្សព្វផ្សាយឲ្យកាត់បន្ថយការផ្សាយនៅត្រឹមមួយសប្ដាហ៍ម្ដង ឬមួយខែម្ដងវិញ ដោយថាកុំឲ្យប្រជាពលរដ្ឋធុញទ្រាន់និងសំឡេងនេះ។ លោកមានប្រសាសន៍ថា «យើងមិនអាចរត់តែរឿងហ្នឹង[“មីក្រូហិរញ្ញវត្ថុជារបស់ឯកជន មិនមែនជារបស់រដ្ឋទេ”]តែរហូតមួយឆ្នាំ វាទៅជាជ្រិញវិញហើយ ប្រហែលជាខ្ញុំពិគ្រោះ សុំយោបល់ពីសម្តេចនាយករដ្ឋមន្ត្រី ថាយើងរត់១អាទិត្យចប់ត ឬបន្ទាប់មក១ខែយើងចេញមួយដងទៅវិញ ជាការល្អ គឺជាបញ្ហាបច្ចេកទេ»។
ប៉ុន្តែនៅថ្ងៃទី១០មីនានេះ និយ័តករទូរគមនាគមន៍កម្ពុជា បែរជារំឭកក្រុមហ៊ុនទូរសព្ទទាំងអស់ ត្រូវបង្កើនបច្ចេកទេស កុំឲ្យអតិថជនរបស់ខ្លួន អាចលុបចេញបាន នូវសារជាសំឡេងក្នុងទូរសព្ទដៃ ដើម្បីឲ្យសម្រេចផែនការរបស់ប្រមុខរដ្ឋាភិបាល។
ទោះជាយ៉ាងណា អនុសាសន៍ របស់នាយករដ្ឋមន្ត្រីនេះ ត្រូវបានមជ្ឈដ្ឋានមួយចំនួនរិះគន់ថា មិនបានជួយដោះបន្ទុកដល់ពលរដ្ឋដែលកំពុងជាប់បំណុលនោះទេ។
អ្នកតាមដានខ្លះផ្តល់អនុសាសន៍វិញថា ដើម្បីជួយដោះបន្ទុកពលរដ្ឋដែលកំពុងជាប់បំណុលបាន រដ្ឋាភិបាលគួរអន្តរាគមន៍ឲ្យគ្រឹះស្ថានឯកជនទាំងនោះ បញ្ចុះការប្រាក់ ឬរដ្ឋាភិបាល លើកលែងពន្ធក្នុងកម្រិតណាមួយដល់គ្រឹះស្ថានមីក្រូហិរញ្ញវត្ថុទាំងនោះ ទើបអាចជួយពលរដ្ឋដែលកំពុងជាប់បំណុលបាន៕