បក្សប្រឆាំងបានរំឭកសកម្មជនរបស់ខ្លួនជាថ្មីទៀត ឲ្យត្រៀមខ្លួនឆ្ពោះទៅកាន់កាបោះឆ្នោត ដោយមិនយកខ្មែរណាធ្វើជាសត្រូវ ខណៈបក្សកាន់អំណាចព្រមានប្តឹងសារនយោបាយដែលថា «ដូរមេឃុំបម្រើបក្ស ដាក់មេឃុំបម្រើរាស្ត្រ»។
នៅពេលថ្មីៗនេះបក្សប្រឆាំងបានប្រកាសថា គោលនយោបាយជាអទិភាពចំនួន៥ចំនុចដែលនឹងត្រូវយកទៅឃោសនារកសំឡេងឆ្នោត សម្រាប់ជ្រើសរើសក្រុមប្រឹក្សាឃុំ-សង្កាត់នាពេលខាងមុខនេះ រួមទាំងមានពាក្យថា «ដូរមេឃុំបម្រើបក្សដាក់មេឃុំបម្រើរាស្ត្រ»។
ប៉ុន្តែសារនយោបាយនេះ ត្រូវបក្សកាន់អំណាចគំរាមប្តឹង បើមិនកែតម្រូវ ដោយចាត់ទុកថាសារនយោបាយរបស់បក្សប្រឆាំងមួយឃ្លានេះ មានចរឹកបែបញុះញង់និងបង្កហេតុ។
ក្នុងពិធីជួបជុំសកម្មជនរបស់ខ្លួននៅស្នាក់ការគណបក្សក្នុងរាជធានីភ្នំពេញ នាថ្ងៃទី១៤ ខែមីនានេះ ប្រធានគណបក្សសង្គ្រោះជាតិ លោក កឹម សុខា ថ្លែងថា គណបក្សនេះបានយល់ច្បាប់ពីភាពរឹងមាំរបស់ខ្លួននិងថាក៏បានយល់ច្បាប់ពីកលល្បិចរបស់ដៃគូប្រកួតរបស់ខ្លួនដែរ។
លោក កឹម សុខា បន្តថា ជម្រើសទៅកាន់ការបោះឆ្នោតនៃប្រទេសដែលប្រកាន់លទ្ធិប្រជាធិបតេយ្យ លោកថាគឺការបោះឆ្នោតឆ្នោតមួយត្រូវុមានការប្រកួតប្រជែងដោយតម្លាភាពនិងមិនយកខ្មែរណាធ្វើជាសត្រូវ។
លោកថា៖ «ការប្រកួតគ្នាដោយសុចរិតដោយថ្លៃថ្នូរនេះ គឺជាផ្លូវមួយនាំទៅរកស្ថេរភាព សន្តិភាព និងការរីកចម្រើនពិតប្រាកដ សុខដុមរមនារវាងខ្មែរនិងខ្មែរទាំងអស់គ្នា។ គ្មានជម្រើសណាដែលល្អជាងជម្រើសនៃការបោះឆ្នោតទេសម្រាប់អ្នកប្រជាធិបតេយ្យ។ សម្រាប់ខ្មែរអ្នកស្ហេហាជាតិ។ ពីព្រោះយើងជាអ្នកប្រជាធិបតេយ្យ យើងចង់បានការប្រកួតដោយសុច្ចរិតដោយថ្លៃថ្នូរដោយគ្មានហិង្សា ជៀសវាងការធ្វើសង្គ្រាម ជៀសវាងការបះបោរ ជៀសវាងការធ្វើបក្សដិវត្តន៍។ នេះហើយជាជម្រើសរបស់យើង»។
ជាងនេះទៅទៀត លោក កឹម សុខា ក៏បានសរសេរនៅលើហ្វេសប៊ុករបស់លោកដែរថា ទៅថ្ងៃខាងមុខលោកចង់ឃើញពលរដ្ឋខ្មែរគ្រប់រូបរស់នៅមានសេចក្ដីសុខក្នុងគ្រួសារខ្មែរតែមួយ។
លោកថា៖ «ការប្រកួតប្រជែងគោលនយោបាយល្អៗ សម្រាប់កសាងអនាគតកាលជាវិជ្ជមាន ប្រសើរជាងការគាស់កកាយឈ្លោះគ្នារឿងអតីតកាល»។
ការលើកឡើងរបស់មេដឹកនាំបក្សប្រឆាំងនេះ ហាក់បានឆ្លើយតបទៅនឹងការលើកឡើងរបស់លោកនាយករដ្ឋមន្ត្រី ហ៊ុន សែន ដែលតែងថ្លែងនៅវេទិការសាធារណៈថា បើបក្សកាន់អំណាចចាញ់ឆ្នោត អាចនឹងមានសង្គ្រាមកើតឡើង។
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានស្វាគមន៍ទៅនឹងសារនយោបាយរបស់មេបក្សប្រឆាំង លោក កឹម សុខា។ ប៉ុន្តែលោកថា អ្វីដែលជាដើមចមបង្កឲ្យមានភាពមិនទុកចិត្តគ្នានិងបង្កឲ្យមានវិវាទនយោបាយកើតឡើង សម្រាប់ទីលានប្រកួតរកប្រជាប្រិយភាពនោះ លោកថាដោយសាតែបក្សប្រឆាំងធ្វើសកម្មភាពផ្ទុយពីការនិយាយ។
លោកថា៖ «គណបក្សប្រជាជនស្វាគមន៍ណាស់ ចង់បានអាហ្នឹងណាស់។ ពីព្រោះគណបក្សប្រជាជនជាស្ថាបនិកនៃវប្បធម៌សន្ទនាដើម្បីស្វែងរកសុខដុមរមនីយកម្មសង្គមរបស់កម្ពុជាទាំងមូល។ សុខដុមរមនីយកម្មហ្នឹងមិនឲ្យខ្មែរណា ទោះបីខ្មែរនៅនិន្នាការនយោបាយនៅខាងណាក៏ដោយ មិនគិតគ្នាជាគូសត្រូវទេ។ ក៏ប៉ុន្តែនៅក្នុងប្រទេសដែលប្រកាន់លទ្ធិប្រជាធិបតេយ្យសេរីពហុបក្សប្រកួតប្រជែងគ្នាលើឆាកនយោបាយ អាហ្នឹងយើងគិតជាគូប្រកួត មិនមែនគិតជាគូសត្រូវទេ។ អានេះហើយជាសំណូមពររបស់គណបក្សប្រជាជនដែលចង់បានតាំងពីដើមទីមកបាទ។ ការនិយាយថាបើមិនយកខ្មែរណាធ្វើជាសត្រូវ យើងត្រូវអនុវត្តឲ្យស្របតាមទ្រឹស្តីនិយាយហ្នឹង»។
សមាជិកសម្ព័ន្ធកំណែទម្រង់ការបោះឆ្នោតរបស់ ERA លោក យង់ គិមអេង លើកឡើងថា ទីលានប្រកួតឆ្ពោះទៅកាន់ការបោះឆ្នោតលោកថា បក្សកាន់អំណាចមានប្រៀបលើសលប់ ទាំងការធ្វើច្បាប់និងប្រើប្រាស់វិធានការច្បាប់ លោកថាពិសេសច្បាប់គណបក្សនយោបាយ ដែលគណបក្សប្រជាជនកម្ពុជាទើបនឹងអនុម័តថ្មីៗនេះ។
ប៉ុន្តែលោក យង់ គិម អេង អះអាងថា ជាការប្រសើរ បើអ្នកនយោបាយរៀបចំខ្លួនទៅកាន់ទីលានប្រកួតការបោះឆ្នោតដោយតម្លាភាពនោះ។
លោកថា៖ «ជាទូទៅសង្គមស៊ីវិល យើងលើកកម្ពស់ការបោះឆ្នោតដោយសេរី ត្រឹមត្រូវ និងយុត្តិធម៌បាទ។ ដូច្នេះយើងចង់ឃើញការបោះឆ្នោតហ្នឹងមានការប្រកួតប្រជែងដោយយុត្តិធម៌ដោយស្មោះត្រង់ ហើយឈរលើគោលការណ៍ច្បាប់ជាពិសេសឈរលើកគោលការណ៍សកលនៃយុត្តិធម៌ហ្នឹងបាទ»។
ទោះជាការបោះឆ្នោតជ្រើសរើសឃុំ-សង្កាត់នៅតែជាងពីរខែទៀតប៉ុណ្ណោះ ប៉ុន្តែអ្នកនយោបាយដែលមានអាសនៈក្នុងសភា មិនទាន់បានប្រកាសជួបគ្នាឡើងវិញ ដើម្បីស្វែងរកការធានាដល់ការប្រកួតប្រជែងដោយតម្លាភាពណាមួយតាមយន្តការប្រជាធិបតេយ្យនៅឡើយទេ៕