អង្គការឃ្លាំមើលសិទ្ធិមនុស្សអន្ដរជាតិ បានអំពាវនាវទៅអូស្ដ្រាលី ឲ្យលើកយកបញ្ហាសិទ្ធិមនុស្សនៅកម្ពុជា និងនៅប្រទេសសមាជិកអាស៊ានផ្សេងទៀត ទៅពិភាក្សាក្នុងកិច្ចប្រជុំកំពូលមួយនាពេលខាងមុខនេះ។
ក្នុងសេចក្ដីថ្លែងការណ៍ចេញផ្សាយនៅថ្ងៃនេះ អង្គការឃ្លាំមើលសិទ្ធិមនុស្សអន្ដរជាតិ (Human Rights Watch) បានលើកឡើងថា អូស្ដ្រាលីមិនត្រូវគិតតែពីការរឹតចំណងសេដ្ឋកិច្ច និងទំនាក់ទំនងពាណិជ្ជកម្មជាមួយបណ្ដាប្រទេសសមាជិកអាស៊ានពេក ហើយភ្លេចគិតពីបញ្ហាសិទ្ធិមនុស្សជាមួយកម្ពុជា ថៃ វៀតណាម ហ្វីលីពីន និងមីយ៉ាន់ម៉ា នោះទេ។
បើតាមសេចក្ដីថ្លែងការណ៍ អង្គការសិទ្ធិមនុស្សមួយនេះ និយាយថា ការជជែកពីបញ្ហាសិទ្ធិមនុស្ស និងគោលការណ៍ប្រជាធិបតេយ្យ មិនមែនមានន័យថា អូស្ដ្រាលីលូកលាន់កិច្ចការផ្ទៃក្នុងប្រទេសណាមួយឡើយ ប៉ុន្ដែ គឺធ្វើក្នុងនាមជាប្រទេសជំរុញការគោរពសិទ្ធិមនុស្ស គោរពនីតិរដ្ឋ បើកលំហរសេរីភាពសារព័ត៌មាន និងជាប្រទេសប្រកាន់លទ្ធិប្រជាធិបតេយ្យចាស់ជាងគេនៅក្នុងតំបន់។
អង្គការអន្ដរជាតិមួយនេះ ក៏ជំរុញឲ្យអូស្ដ្រាលីឲ្យផ្អាកសមយុទ្ធយោធាជាមួយកម្ពុជា ដោយថា រដ្ឋាភិបាលរបស់លោកនាយករដ្ឋមន្ដ្រី ហ៊ុន សែន បានរំលោភសិទ្ធិមនុស្សធ្ងន់ធ្ងរ ដូចជា រំលាយអតីតបក្សប្រឆាំង បិទបណ្ដាញសារព័ត៌មាន និងអង្គការសង្គមស៊ីវិល។
លោក ហ៊ុន សែន ត្រូវបានរដ្ឋាភិបាលអូស្ដ្រាលី អញ្ជើញទៅចូលរួមកិច្ចប្រជុំកំពូលអាស៊ាន-អូស្ដ្រាលី នៅថ្ងៃទី១៧ និង១៨ខែមិនាខាងមុខនេះ ប៉ុន្ដែ វត្តមានរបស់មេដឹកនាំកម្ពុជារូបនេះនៅលើទឹកដីអូស្ត្រាលី នឹងប្រឈមទៅនឹងបាតុកម្មតវ៉ានានាពីសំណាក់ពលរដ្ឋខ្មែរ-អូស្ត្រាលីនៅទីនោះ៕