អាជ្ញាធរជាតិអប្សរាឲ្យដឹងថា ដើមឈើជាច្រើនដើមនៅតំបន់ឧទ្យានអង្គរ ត្រូវបានដួលរលំនិងបាក់មែកដោយសារភ្លៀងខ្យល់កន្ដ្រាក់ កាលពីល្ងាចថ្ងៃទី១៣ខែឧសភាម្សិលមិញ ប៉ុន្ដែមិនប៉ះពាល់ដល់ប្រាសាទបុរាណ។
សេចក្ដីប្រកាសព័ត៌មានរបស់អាជ្ញាធរជាតិអប្សរា បានឲ្យដឹងថា ដើមឈើជាច្រើនដើមនៅតាមប្រាសាទមួយចំនួនក្នុងតំបន់អង្គរ បានដួលរលំនិងបាក់មែកសង្កត់ផ្លូវ ដោយសារភ្លៀងលាយឡំខ្យល់កន្ដ្រាក់ខ្លាំង បានកើតឡើងនៅម៉ោងជិត៤សៀល ថ្ងៃទី១៣ខែឧសភានេះ។ នៅក្នុងសេចក្ថីថ្លែងការអះអាងថា ដើមឈើ ដែលបានដួលរលំនិងបាក់មែកនោះ ស្ថិតនៅប្រាសាទមួយចំនួន ដូចជានៅបរិវេណប្រាសាទព្រះវិហារ៧ល្វែង ក្នុងនោះបានបាក់សង្កត់លើតូបដូនជីស្នាក់នៅបណ្ដាលឲ្យខូចខាតមួយចំនួនផងដែរ។
សេចក្តីប្រកាសព័ត៌មានបញ្ជាក់ថា ដើមឈើដែលបានដួលរលំនិងបាក់មែកនោះជាប្រភេទឈើទាល ដើមសង្កែ ដើមក្រឡាញ់ និងដើមត្នោត ប៉ុន្ដែអាជ្ញាធរអប្សរាអះអាងថា មិនប៉ះពាល់ដល់ប្រាសាទបុរាណនោះឡើយ ដោយគ្រាន់តែបាក់រលំសង្កត់ថ្ម និងផ្លូវប៉ុណ្ណោះ។ ក្រោយពីមានឧបទ្ធវហេតុនេះកើតឡើង អាជ្ញាធរ ជាតិអប្សរា បានរៀបចំសណ្ដាប់ធ្នាប់ និងកាប់ដើមឈើនិងមែកឈើដែលរលំសង្កត់ប្រាសាទរួចរាល់ហើយ៕
