សមត្ថកិច្ចចម្រុះនៅខេត្តពោធិ៍សាត់ អះអាងថា ពួកគេប្រមូលបានភស្តុតាងមួយចំនួនពីអ្នកដែលបានកាប់រានព្រៃរងទឹកភ្លៀងក្នុងអាងវារីអគ្គិសនីស្ទឹងអាតៃជាច្រើនកន្លែង ហើយថានឹងបញ្ជូនករណីនេះទៅតុលាការនៅពេលខាងមុខ។
ក្រសួងបរិស្ថានបានផ្សព្វផ្សាយលើទំព័រហ្វេសប៊ុករបស់ខ្លួនចុះថ្ងៃ១៣ ខែឧសភា បានឲ្យដឹងថា កម្លាំងមន្ត្រីឧទ្យានុរក្សនៃក្រសួងបរិស្ថាន កងកម្លាំងយោធា និងប្រជាពលរដ្ឋមូលដ្ឋានចំនួន ១៥នាក់ បានចុះពិនិត្យការរុករានដីព្រៃរងទឹកភ្លៀងអាងវារីអគ្គិសនីស្ទឹងអាតៃ នៅក្នុងភូមិសាស្ត្រឃុំអូរសោម ស្រុកវាលវែង នៃតំបន់ដែនជម្រកសត្វព្រៃភ្នំ សំកុស ខេត្តពោធិ៍សាត់។
តាមក្រសួងបរិស្ថានដដែលឲ្យដឹងថា ក្នុងការចុះត្រួតពិនិត្យនោះឃើញមានការកាប់រានដីព្រៃជាច្រើនកន្លែងគួរឲ្យព្រួយបារម្ភ ប៉ុន្តែក្រុមមន្ត្រីមិនបានជួបអ្នកប្រព្រឹត្តនោះទេ។ ក្រុមសមត្ថកិច្ចប្រទះឃើញមានការដាំដំណាំម្នាស់ ដំឡូង ចេក អំពៅដែលទើបតែដាំថ្មីៗ និង រោងចាំចំការទើបសង់បន្ទាប់ពីកាប់រាន និងដុតព្រៃរួចតែប៉ុណ្ណោះ។
តាមក្រសួងបរិស្ថានឲ្យដឹងទៀតថា ករណីនេះសមត្ថកិច្ចបានកំណត់មុខសញ្ញាអ្នកបង្ក និងអ្នកនៅពីក្រោយខ្នងរួចហើយ នៅចាំតែប្រមូលភស្តុតាងមួយចំនួនទៀតដើម្បីធ្វើសំណុំរឿងបញ្ជូន ទៅតុលាការចាត់ការតាមផ្លូវច្បាប់។
មន្ត្រីសម្របសម្រួលអង្គការលីកាដូប្រចាំខេត្តពោធិ៍សាត់ លោក អេង ឈុនហាន មានប្រសាសថា កន្លងមកពិតជាមានការកាប់រានបំផ្លាញព្រៃនៅតំបន់នោះមែន។ ប៉ុន្តែលោកជំរុញឲ្យអាជ្ញាធរអនុវត្តច្បាប់ឲ្យស្មើភាពគ្នាចំពោះចំណាត់ការទៅលើអ្នកកាប់រានព្រៃនេះ ជៀសវាងការអនុវត្តទៅលើតែប្រជាពលរដ្ឋ តែមិនចាត់វិធានការលើឈ្នួញធំៗ៕