នៅទីបំផុតការប្រកួតជម្រុះក្នុងវគ្គពាក់កណ្ដាលផ្ដាច់ព្រ័ត្រដើម្បីស្វែងរកអ្នកខ្លាំង២នាក់ អោយទៅប្រកួតដណ្ដើមយកតំណែងជើងឯកក្នុងព្រឹត្តិការណ៍ TV5 Knock Out Series By K-Cement របស់សង្វៀនប៉ុស្ដិ៍លេខ៥ត្រូវបានបញ្ចប់ហើយ ដោយក្នុងចំណោមកីឡាករ៤នាក់ចុងក្រោយ គឺ២នាក់ត្រូវបានជ្រុះចេញពីឱកាសយកពានជើងឯក ហើយកីឡាករ២នាក់ត្រូវបានឡើងបន្ត។ បើទោះជាការប្រកួតក្នុងវគ្គចុងក្រោយ នៅមិនទាន់បានធ្វើ ប៉ុន្តែក្នុងចំណោមអ្នកបានឡើងទាំង២ គឺត្រូវគេកំណត់ថាជាម្ចាស់ជើងឯក និងជាជើងឯករងដោយគ្មានប្រកែកបាន។
យោងតាមលទ្ធផលដែលបានស្ដែងឡើង កីឡាករវ័យក្មេងជើងខ្លាំង ធន មករា ដែលស្លៀកខោធម្មតាក្នុងរូប និងកីឡាករជើងខ្លាំងវ័យក្មេង លន បញ្ញា បានទម្លាក់គូប្រកួតដែលជាខ្លាំងរបស់ខ្លួនយ៉ាងគួរអោយកត់សម្គាល់ក្នុងការប្រកួតពាក់កណ្ដាលផ្ដាច់ព្រ័ត្រ ដែលបានធ្វើឡើងកាលពីថ្ងៃទី១២ ឧសភា មុននេះ។ ការប្រកួតរបស់ពួកគេទាំង៤ មិនមានអ្នកណាមិនចាប់អារម្មណ៍នោះទេ ដោយសារតែកីឡាករម្ខាងៗទាំង៤រូបសុទ្ធតែបានប្រឹងវាយឡើងអស់ពីសមត្ថភាព ហើយធ្វើអោយសង្វៀនរបស់ប៉ុស្ដិ៍លេខ៥ទាំងមូលកក្រើក ហើយមានការចាប់អារម្មណ៍។ ការប្រកួតដែលទើបបញ្ចប់ អ្នកចាញ់ការប្រកួតសុទ្ធតែបង្ហាញអារម្មណ៍សោកស្ដាយ ខណៈដែលអ្នកឈ្នះក៏នៅផឺតពោះមិនដឹងថាតើខ្លួននឹងក្លាយជាម្ចាស់ជើងឯក ឬបានត្រឹមតែជាជើងឯករង ក្រោយពីមានឱកាសបានឡើងទៅកាន់ការប្រកួតក្នុងវគ្គផ្ដាច់ព្រ័ត្រទៅហើយ។ កីឡាករធន់ មករា ដែលស្លៀកខោគគី គឺជាជើងថ្មី និងមិនទាន់មានឈ្មោះបោះសំឡេងនោះទេ ប៉ុន្តែគេបានបង្កើតប្រវត្តិកម្រមួយ ដោយអាចវាយផ្ដួលកីឡាករជើងខ្លាំង និងល្បីឈ្មោះជាយូរមកហើយ គឺយុគ យក្សផ្លែ អោយបរាជ័យដោយពិន្ទុ ក្នុងពេលដែលយុគ យក្សផ្លែ គឺជាកីឡាកររៀមច្បង ដែលអ្នកណាក៏មើលឃើញថាមិនគួរនឹងចាញ់កីឡាករសិស្សប្អូនទាល់តែសោះ។ ការប្រកួតរបស់គូនេះ មានភាពស្វិតស្វាញសម្បើមណាស់ ដោយអាចនិយាយបានថាអ្នកចាញ់ក៏ទ្រមខ្លួន ហើយអ្នកឈ្នះគឺរឹតតែទ្រមខ្លួនទៅទៀត ដើម្បីដណ្ដើមយកឱកាសឡើងទៅប្រកួតយកខ្សែក្រវាត់ និងប្រាក់លាន ដែលជាវគ្គនៃក្ដីស្រម៉ៃនៅក្នុងអាជីព។ យ៉ាងណាមិញ កីឡាករ យុគ យក្សផ្លែ នៅតែមិនអាចសម្រេចក្ដីសុបិន្ដ ដោយក្រោយការប្រកួត៣ទឹកនៅលើសង្វៀន បានត្រឹមតែរងការអាម៉ាស់ប៉ុណ្ណោះ ព្រោះត្រូវកីឡាករស្រករក្រោយ ធន់ មករា វាយអោយចាញ់ដែលធ្វើអោយគេបានត្រឹមតែឡើងប្រកួតយកលេខ៣ នៅ២សប្ដាហ៍ក្រោយ។
ងាកទៅកាន់កីឡាករ លន បញ្ញា ឯណោះវិញ គេក៏ល្អណាស់ដែរ ដោយសារតែគេបានបង្ហាញសមត្ថភាពនៅលើសង្វៀន ហើយធ្វើអោយម្នាក់ៗកោតសរសើរជាមួយនឹងកណ្ដាប់ដៃ និងសមត្ថភាពដែលអាចវាយផ្ដួលគូប្រកួតម្ខាងទៀត គឺកីឡាករ សង គង់ អោយបរាជ័យតាមការចង់បាន។ លន បញ្ញា ដែលទើបចុះពីរេញ ហើយស្លៀកខោកីឡាពណ៌ខៀវផ្ដល់សម្ភាសន៍អោយអ្នកសារព័ត៌មានយើងបានអះអាងថា លោកមិនមានជំននឿចិត្តថាលោកនឹងឈ្នះការប្រកួតក្នុងថ្ងៃនោះទេ ក្នុងពេលដែលគូប្រកួតរបស់លោកគឺជាជើងខ្លាំងម្នាក់ដែលល្អទាំងកណ្ដាប់ដៃ និងថ្វីជើង តែលោកអាចយកប្រៀបដោយសារតែបានកម្ពស់ខ្ពស់ជាង។ យ៉ាងណាមិញ លោកថាមិនទាន់រំពឹងថាការប្រកួតនៅវគ្គចុងក្រោយនៅពេលខាងមុខ នឹងឈ្នះកីឡាករធន់ មករា ឬយ៉ាងណានោះទេ អ៊ីចឹងហើយទើបគេមិនទាន់ដឹងថារវាងពួកគេថាតើអ្នកណាជាម្ចាស់ជើងឯក ហើយអ្នកណាជាជើងឯករង។