គណបក្សប្រឆាំង ស្នើរដ្ឋាភិបាល បំភ្លឺជាថ្មីពីមូលហេតុ ដែលនៅតែបន្តឲ្យក្រុមហ៊ុនមួយ ធ្វើអាជីកម្មខ្សាច់នៅខេត្តកោះកុង ដោយថាការស្នើសុំនេះដើម្បីទប់ស្កាត់អំពើពុករលួយ ពីសំណាក់មន្ត្រីខិលខូច។
កាលពីចុងឆ្នាំ២០១៦ក្រសួងរ៉ែងនិងថាមពលបានចាត់វិធានការផ្អាកនំាំចេញខ្សាច់ទៅលក់នៅក្រៅប្រទេសជាណ្តោះអាសន្ន បន្ទាប់ពីអង្គការសង្កមស៊ីវិលរកឃើញថា ការនាំខ្សាច់ចេញទៅលក់នៅក្រៅប្រទេស មានអំពើពុករលួយបាត់ថវិកាជាតិរាប់សិបលានដុល្លារ។
ក្នុងលិខិតមួយច្បាប់ របស់ប្រធានក្រុមតំណាងរាស្ត្របក្សសង្រ្គោះជាតិ លោក សុន ឆ័យ តាមរយៈប្រធានរដ្ឋសភា លោក សុន ឆ័យ ស្នើឲ្យរដ្ឋមន្ត្រីក្រសួងរ៉ែនិងថាមពល លោក ស៊ុយ សែម បំភ្លឺពីចំពោះការបន្តអាជីវកម្មខ្សាច់ បង្ហាញឯកសារពាក់ព័ន្ធដើម្បី ពង្រឹងគណនេយ្យភាព ជម្រះមន្ទិលសង្ស័យថា អាចមានអំពើពុករលួយ ព្រមទាំងជៀសវាងការភាន់ច្រឡំ។
អ្នកនាំពាក្យក្រសួងរ៉ែ និងថាមពល លោក ឌិត ទីណា អះអាងថា ក្រសួងមិនទាន់ទទួលបានលិខិត របស់តំណាងរាស្ត្របក្សប្រឆាំង ដែលស្នើឡើងដោយលោក សុន ឆ័យ នោះនៅឡើយទេគិតត្រឹមថ្ងៃពុធនេះ។
ប៉ុន្តែអ្នកនាំពាក្យរូបនេះ បញ្ជាក់ថា ក្រសួងនឹងសហការបំភ្លឺជំរុញវិញការស្នើនេះ បើទោះបីកន្លងទៅក្រសួង ធ្លាប់ទទួលរងពីការចោទប្រកាន់ថាមានអំពើពុករលួយក៏ដោយ។
លោកថា៖ «ការយល់មិនគ្រប់គ្រាន់ ឬក៏ជាចេតនាចង់លាបពណ៌ក្រសួងយើងនេះ គឺកើតមានតាំងពីដើមមក ហើយយើងតែងតែបានព្យាយាម បកស្រាយពន្យល់ជារហូតមក។ ប៉ុន្តែយើងនៅតែបន្តពន្យល់តទៅទៀតអត់បញ្ហាអីទេ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថា ការជំរុញរបស់តំណាងរាស្ត្របក្សប្រឆាំង លោកថា ជាកត្តាជំរុញឲ្យមានតម្លាភាព ទប់ស្កាត់អំពើពុករលួយ។ លោក សន ជ័យ បន្តថា ក្រសួងគួរតែហ៊ានលាតត្រដាងការពិត ដើម្បីផ្តល់ជំនឿដល់សាធារណជន បើខ្លួនមិនជាប់ពាក់ព័ន្ធនឹងរឿងអាស្រូវដូចការបែកធ្លាយកន្លងទៅនោះ ។
លោកថា៖ «យើងគិតមើថា តើប្រជាពលរដ្ឋសាមញ្ញ ឬក៏សហគមន៍នឹងគាត់ងាយទេ បើសូម្បីតែតំណាងរាស្ត្រហ្នឹងគាត់មិនបានទួលបានព័ត៌មានឬក៏ឯកសារហ្នឹងផងហ្នឹង។ អញ្ចឹងខ្ញុំថាដើម្បីចូលរួមចំណែងធ្វើកំណែទម្រង់ក្នុងការគ្រប់គ្រងធនធានខ្សាច់ របស់ក្រសួងរ៉ែនិងថាមពល ខ្ញុំថាការផ្សព្វផ្សាយកិច្ចព្រៀមព្រៀងឬក៏អាជ្ញាប័ណ្ណឬក៏ព័ត៌មានដែលពាក់ព័ន្ធនឹងការផ្តល់សិទ្ធិធ្វើអាជីវកម្មខ្សាច់ហ្នឹង ខ្ញុំគិតថាជាចំនុចមួយដ៏សំខាន់ ក្នុងកិច្ចការងារ របស់ក្រសួងរ៉ែងនិងថាមពល»។
កាលពីចុងឆ្នាំ២០១៦ រដ្ឋមន្ត្រីក្រសួងរ៉ែនិងថាមពល លោក ស៊ុយ សែម ធ្លាប់ចូលបំភ្លឺនៅមន្ទីររដ្ឋសភា តបតាមសំណើរ របស់តំណាងរាស្ត្របក្សប្រឆាំងម្តងហើយ ក្រោយពីអង្គការសង្គមស៊ីវិល រកឃើញថា ការនាំខ្សាច់ទៅលក់នៅប្រទសសិង្ហបុរី មានអំពើពុករលួយធ្វើឲ្យបាត់ថវិកាជាតិច្រើនលានដុល្លារ ប៉ុន្តែករណីនេះត្រូវក្រសួងច្រានចោល៕
