សមាជិកសភាអឺរ៉ុបសម្តែងការព្រួយបារម្ភថាសកម្មភាពដែលរដ្ឋាភិបាលកំពុងតែធ្វើការគាបសង្កត់លើគណបក្សសង្គ្រោះជាតិនឹងអាចធ្វើឲ្យប៉ះពាល់ធ្ងន់ធ្ងរដល់ទំនាក់ទំនងរវាងប្រទេសកម្ពុជា និងសហភាពអឺរ៉ុប។
ក្រុមសមាជិកក្រៅផ្លូវការនៃក្រុមគាំទ្រប្រជាធិបតេយ្យនៅកម្ពុជារបស់សភាអឺរ៉ុប បានចេញសេចក្ដីថ្លែងការណ៍ មួយចុះថ្ងៃទី ១៣ ខែតុលាម្សិលមិញ ស្ដីពីសកម្មភាពគាបសង្កត់ថ្មីៗទៅលើបក្សប្រឆាំងថា ជាការព្រួយបារម្ភ និងប៉ះពាល់ធ្ងន់ធ្ងរដល់ទំនាក់ទំនងរវាងប្រទេសកម្ពុជា និងសហភាពអឺរ៉ុប។
ក្នុងសេចក្ដីថ្លែងការណ៍ដដែលបន្តថាសម្រាប់ការបោះឆ្នោតឆ្នាំ ២០១៨ ខាងមុខ ជិកមកដល់ ហើយប្រធានគណបក្សប្រឆាំងលោក កឹម សុខា នៅបន្តរងការឃុំខ្លួន នោះពួកគេជឿថាការគាប់សង្កត់ថ្មីៗនេះបានបង្កគ្រោះថ្នាក់ធ្ងន់ធ្ងរដល់ប្រជាធិបតេយ្យ សេរីពហុបក្ស នីតិរដ្ឋ និងសិទ្ធិនយោបាយសម្រាប់ពលរដ្ឋនៅកម្ពុជា។
សេចក្ដីថ្លែងការណ៍ដដែលបន្ថែមថាពួកគេសម្ដែងការព្រួយបារម្ភជាថ្មី និង ជំរុញឲ្យរដ្ឋាភិបាលអនុវត្តតាមបែបប្រជាធិបតេយ្យឲ្យបានឆាប់រហ័ស តាមអនុសាសន៍របស់ឧត្តមស្នងការការពារសិទ្ធិមនុស្សនៃអង្គការសហប្រជាជាតិ និង បញ្ឈប់ការប៉ុនប៉ង រំលាយគណបក្សសង្គ្រោះជាតិ ដែលធ្វើឲ្យប៉ះពាល់ដល់ការប្រកួតប្រជែងនយោបាយដោយត្រឹមត្រូវនិងយុត្តិធម៌តាមរយៈការបោះឆ្នោតថ្នាក់ជាតិខាងមុខ។
ទោះបីជាយ៉ាងណាមន្រ្តីរដ្ឋាភិបាលលើកឡើងថាគណបក្សប្រឆាំងខ្លួនឯង ជាអ្នកប្រព្រឹត្តល្មើសដែលប្រឈមមុខនឹងច្បាប់ ទើបធ្លាក់ដល់ដំណាក់កាលនេះ។
សហគមន៍អន្តរជាតិដែលរួមមាន រដ្ឋាភិបាលប្រទេសអូស្ដ្រាលី សហភាពអឺរុប បារាំង អាល្លឺម៉ង់ សហរដ្ឋអាមេរិក និងអង្គការសិទ្ធិមនុស្សមួយចំនួនទៀត បានហៅការចាប់ខ្លួនលោក កឹម សុខា ថា ជាការគំរាមកំហែងផ្នែកនយោបាយ និងទទូចឲ្យដោះលែង លោក កឹម សុខា ជាបន្ទាន់ ដោយថា ដើម្បីធានាដំណើរការបោះឆ្នោត ដែលត្រូវតែមានភាពសេរី ត្រឹមត្រូវ និងយុត្តិធម៌៕
