កម្ពុជាទទួលបានពានរង្វាន់អន្តរជាតិលើការងារសុវត្ថិភាពចរាចរណ៍ពីប្រទេសអង់គ្លេស ហើយពានរង្វាន់នេះត្រូវបានព្រះអង្គម្ចាស់ Michael ប្រគល់ជូនលោករដ្ឋមន្រ្តីក្រសួងមហាផ្ទៃ ស ខេង នៅថ្ងៃទី១៣ ខែធ្នូ ឆ្នាំ២០១៦នេះ នៅទីក្រុងឡុងដ៍។
ពានរង្វាន់អន្តរជាតិសុវត្ថិភាពចរាចរណ៍ផ្លូវគោកនៃព្រះអង្គម្ចាស់ Michael ត្រូវបានរៀបចំឡើងដោយស្ថាប័នមួយមានឈ្មោះថា RoadSafe ដែលដៃគូមនុស្សធម៌មួយមានមូលដ្ឋាននៅទីក្រុងឡុងដ៍ ហើយធ្វើការគៀរគរអ្នកតំណាងទាំងឡាយមកពីវិស័យឯកជន ស្ថាប័នរដ្ឋាភិបាល និងសហគមន៍នានាដែលធ្វើការផ្នែកសុវត្ថិភាពចរាចរណ៍ឲ្យធ្វើការួមគ្នាដើម្បីកាត់បន្ថយការស្លាប់និងការរងរបួសដោយគ្រោះថ្នាក់ចរាចរណ៍ទូទាំងសកលលោក។
លោក ស ខេង ត្រូវបានដកស្រង់សំដីក្នុងសេចក្តីប្រកាសព័ត៌មានរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកមកថា «បន្ទាប់ពីមានការអនុវត្តច្បាប់ស្តីពីចរាចរណ៍ផ្លូវគោកថ្មី យើងបានកាត់បន្ថយចំនួនអ្នកស្លាប់ឱ្យបាន៥០% ក្នុងឆ្នាំ២០២០ហើយដែលនឹងជួយសង្រ្គោះជីវិតប្រជាពលរដ្ឋបានប្រមាណ ៧៣៥០នាក់នៅក្នុងប្រទេសកម្ពុជា»។
តាមរបាយការណ៍ រយៈពេល១១ខែ ឆ្នាំ២០១៦នេះ គ្រោះថ្នាក់ចរាចរណ៍បានថយចុះចំនួនអ្នកស្លាប់ ២៥៩នាក់ និង អ្នករបួសថយចុះចំនួន៥៩៦នាក់ ប្រៀបធៀបនឹងឆ្នាំ២០១៥។
នាយកវិទ្យាស្ថានសុវត្ថិភាពចរាចរណ៍ លោក អ៊ា ចរិយា គិតថាការផ្តល់ពានរង្វាន់នេះគឺជាការលើកទឹកចិត្តមួយសំរាប់ប្រទេសកម្ពុជា ប៉ុន្តែបញ្ហាគ្រោះថ្នាក់ចរាចេណ៍នៅតែជាមូលហេតុធំទីមួយដែលធ្វើឲ្យមានមនុស្សស្លាប់និងបំផ្លាញទ្រព្យសម្បត្តិសាធារណៈ។ លោកបន្តថា៖ «ចំណុចខ្វះខាតដែលយើងត្រូវខិតខំប្រឹងប្រែងបន្តទៀតដូចជា ការអនុវត្តរឹតបន្តឹងច្បាប់របស់យើងពុំទាន់ផ្តោតទៅលើមូលហេតុដែលបង្ករឲ្យមានគ្រោះថ្នាក់ដូចជា ការបើកបរហួសល្បឿនកំណត់ និងបើកបរក្រោមឥទ្ធិពលជាតិស្រវឹងនៅធូររលុង ប្រជាពលរដ្ឋនៅតែប្រព្រឹត្តល្មើស…»។
កាលពីឆ្នាំ២០១៥ គ្រោះថ្នាក់ចរាចរណ៍នៅកម្ពុជាបានសម្លាប់ជីវិតមនុស្ស ៣០ដងច្រើនជាងចំនួនអ្នកស្លាប់ដោយសារជម្ងឺគ្រុនចាញ់ គ្រុនឈាម និងគ្រាប់មីនឬអាវុធយុទ្ធភ័ណ្ឌមិនទាន់ផ្ទុះបូកបញ្ចូលគ្នាទៅទៀត។
ច្បាប់ស្តីពីចរាចរណ៍ផ្លូវគោកថ្មីដែលត្រូវបានអនុម័តក្នុងឆ្នាំ២០១៥ ក៏បានតម្រូវជាលើកដំបូងឱ្យអ្នករួមដំណើរតាមម៉ូតូត្រូវតែពាក់មួកសុវត្ថិភាពបន្ថែមពីលើការកំណត់តែចំពោះអ្នកបើកបរ និងបានចាប់ផ្តើមអនុវត្តចាប់ពីខែមករា ឆ្នាំ២០១៦មក។
បើតាមគណៈកម្មាធិការជាតិសុវត្ថិភាពចរាចរណ៍ផ្លូវគោក អត្រាពាក់មួកសុវត្ថិភាពក្នុងចំណោមអ្នករួមដំណើរតាមម៉ូតូបានកើនឡើងបីដង និង បានបង្ការមនុស្ស៣៤៩នាក់ពីការរងគ្រោះថ្នាក់ និងស្លាប់ដោយគ្រោះថ្នាក់ចរាចរណ៍ ព្រមទាំងបានការពារការខាតបង់ ថវិកាប្រមាណ ៣លានដុល្លារសហរដ្ឋអាមេរិក៕
