យ៉ាងហោចណាស់មនុស្ស ១០នាក់ បានស្លាប់ នៅពេលព្យុះស៊ីក្លូន Vardah បានបោកបក់ទៅលើទីក្រុងជិនណៃ ស្ថិតនៅភាគខាងត្បូងឥណ្ឌា ដោយបានបំផ្លិចបំផ្លាញផ្ទះសម្បែង និងកាត់ផ្ដាច់ប្រព័ន្ធផ្គត់ផ្គង់អគ្គិសនី។ នេះដោយយោងតាមការផ្សាយរបស់ទីភ្នាក់ងារ AFP ដែលបានដកស្រង់សម្ដីរបស់អាជ្ញាធរ។
អ្នកស្លាប់ភាគគឺបណ្ដាលមកពីការរលំដើមឈើសង្កត់លើ បន្ទាប់ពីប្រឈមនឹងខ្យល់ព្យុះបោកបក់ល្បឿន ១៤០គីឡូម៉ែត្រក្នុងមួយម៉ោង ដែលបានកាត់ផ្ដាច់ថាមពលអគ្គិសនីយ៉ាងធំធេងនៅភាគខាងត្បូងប្រទេសឥណ្ឌា។
ទីភ្នាក់ងារឧតុនិយមឥណ្ឌា បាននិយាយថា ព្យុះ Vardah គឺជាព្យុះស៊ីក្លូនអាក្រក់បំផុតដែលបានបោកបក់រដ្ឋតាមីលណាឌូ នៅក្នុងរយៈពេលជាង ២ទសវត្សរ៍ចុងក្រោយនេះ។
ទោះជាយ៉ាងណា ព្យុះនេះបានថមថយឥទ្ធិពលទៅវិញនៅពេលវាបោកបក់ចូលកាន់តែជ្រៅទៅក្នុងដីគោក។
រូបភាពពីទូរទស្សន៍នៅទីក្រុងជិនណៃ ដែលធ្លាប់រងគ្រោះដោយសារទឹកជំនន់សម្លាប់មនុស្ស ២៥០នាក់កាលពីឆ្នាំមុននោះ បង្ហាញរថយន្តជាច្រើនគ្រឿង ត្រូវខ្យល់ព្យុះភ្លៀងបោកបក់ក្រឡាប់ផ្ងាជើង៕