ប្រធានាធិបតី លោក រ៉ូទ្រីហ្កូ ឌូទើតេ បានព្រមានថា លោកនឹងប្រកាសឲ្យប្រើច្បាប់សឹក ប្រសិនបើបញ្ហាគ្រឿងញៀន កាន់តែ “រីករាលដាល”។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលកត់សម្គាល់ឃើញថា លោក ឌូទើតេ បានថ្លែងដូច្នេះ ប៉ុន្មានខែក្រោយពីលោកច្រានចោលនូវការលើកឡើងថា លោកអាចនឹងធ្វើដូច្នេះនោះ។
លោក ឌូទើតេ បានចាត់ទុកសង្គ្រាមដ៏បង្ហូរឈាមប្រឆាំងគ្រឿងញៀន ធ្វើជាគោលនយោបាយដ៏សំខាន់នៅរដ្ឋបាលរបស់លោក ចាប់តាំងពីពេលលោកឡើងកាន់តំណែងកាលពីពាក់កណ្ដាលឆ្នាំមុន។
គិតចាប់តាំងពីខែកក្កដាឆ្នាំមុនមក មនុស្សជាង ៦ពាន់នាក់ហើយ ត្រូវបានគេសម្លាប់នៅក្នុងយុទ្ធនាការប្រឆាំងគ្រឿងញៀន ទាំងអំឡុងពេលប្រតិបត្តិការរបស់ប៉ូលិស និងការសម្លាប់ជនសង្ស័យពាក់ព័ន្ធគ្រឿងញៀនពីសំណាក់មហាជន។ អ្នកប្រើប្រាស់ និងអ្នកជួញដូរគ្រឿងញៀនជាង ១លាននាក់ ត្រូវបានគេចាប់ខ្លួន ឬសារភាពនៅចំពោះមុខអាជ្ញាធរ។
ថ្លែងទៅកាន់សមាជិកក្រុមប្រឹក្សាពាណិជ្ជកម្មនៅទីក្រុង Davao ស្ថិតនៅភាគខាងត្បូងហ្វីលីពីន នៅថ្ងៃនេះ លោក ឌូទើតេ បាននិយាយថា លោកស្បថការពារប្រទេសនេះ ប្រឆាំងរាល់ការគំរាមកំហែងទាំងអស់ រួមទាំងបញ្ហាគ្រឿងញៀន ដែលលោកថា ប៉ះពាល់ដល់មនុស្សប្រហែល ៤លាននាក់៕
