ក្រុមកម្មករនៃរោងចក្រ ហ្វឺស ហ្គាវ័ន្ត ស្ថិតនៅក្នុងសង្កាត់ចាក់អង្រែ ខណ្ឌមានជ័យ បានបន្តធ្វើកូដកម្មទាមទារបប្រាក់ឈ្នួលពីថៅកែរោងចក្រនេះ នៅព្រឹកថ្ងៃនេះ ដែលត្រូវបានក្រុមកម្មករចោទថា មិនគោរពតាមច្បាប់ការងារកម្ពុជា។
កម្មការិនីផ្នែកដេរ អ្នកស្រី សុខ វណ្ណា ប្រាប់វីអូឌីនៅកន្លែងកូដកម្មនៅថ្ងៃនេះថា ថៅកែរោងចក្រមិនបានបើកប្រាក់ឈ្នួលខែនេះឲ្យកម្មករទេ ហើយក្រុមកម្មករបាននាំគ្នាធ្វើកូដកម្មរយៈពេល ៦ថ្ងៃហើយ ដើម្បីទាមទារទៅភាគីពាក់ព័ន្ធឲ្យជួយដោះស្រាយ។
អ្នកស្រីប្រាប់ថា៖ «ហើយសំណូមពរដល់សម្តេច ហ៊ុន សែន ជំទាវ ប៊ុនរ៉ានី ជួយរកយុត្តិធម៌ឲ្យកម្មករ ហ្វឺស ហ្គាវ័ន្ត និង ហ្គាវ័ន្ត ២ ផង ព្រោះថៅកែជនជាតិកូរ៉េមួយហ្នឹង ជិះជាន់មើលងាយកម្មករ សូម្បីសម្តីអាជ្ញាកណ្តាល សម្តីខាងក្រសួងការងារក៏គាត់មិនយកចិត្តទុកដាក់ និងអនុវត្តតាមច្បាប់កម្ពុជាដែរ។ គាត់តែងតែល្មើសនឹងច្បាប់ថៅកែមួយហ្នឹង»។
កម្មកផ្នែកដេរម្នាក់ទៀត អ្នកស្រី ម៉ុល ណៃស៊ីម និយាយថា បញ្ហានេះ បានធ្វើឲ្យជីវភាពគ្រួសារគាត់ជួបការលំបាក ដោយគ្មានលុយបង់ថ្លៃផ្ទះ ទឹកភ្លើង និងចំណាយប្រចាំថ្ងៃជាដើម។
អ្នកស្រីបន្តថា រយៈពេលកម្មករតវ៉ាប៉ុន្មានថ្ងៃនេះ ពួកគាត់បានដាក់លិខិតទៅអាជ្ញាធរពាក់ព័ន្ធឲ្យជួយដោះស្រាយដែរ ប៉ុន្តែ រហូតថ្ងៃនេះ មិនទាន់មានអាជ្ញាធរណាចុះមកដោះស្រាយឲ្យនោះទេ។
អ្នកបន្ថែមថា៖ «អត់លុយបង់ថ្លៃផ្ទះថ្លៃភ្លើង ហើយថ្លៃហូបចុកហ្នឹង ឥលូវអត់មានសោះ ដាច់ហ្មង។ ថៅកែ ពេលមានលុយ បង្ខំយើងឲ្យធ្វើការ ស្រែកថាឲ្យរហូត។ ដល់ពេលអត់មានលុយឲ្យកម្មករ អត់និយាយអីមួយម៉ាត់ អត់ហ៊ានចេញមកនិយាយជាមួយកម្មករផង»។
អ្នកគ្រប់គ្រងក្នុងរោងចក្រ ហ្វឺស ហ្គាវ័ន្ត ដែលសុំមិនបញ្ចេញឈ្មោះ ប្រាប់វីអូឌីថា ខាងរោងចក្រនឹងបើកប្រាក់ឈ្នួលឲ្យកម្មករនៅថ្ងៃស្អែកនេះ។ អ្នកគ្រប់គ្រងក្នុងរោងចក្ររូបនេះ ឲ្យដឹងថា ករណីបើកប្រាក់ឈ្មួលឲ្យកម្មករមិនទៀងទាត់នេះ ដោយសារក្រុមហ៊ុនមានបញ្ហាផ្នែកហិរញ្ញវត្ថុខ្លះៗ បង្វិលលុយឲ្យកម្មករមិនទាន់។
តំណាងក្រុមហ៊ុនបន្ថែមថា៖ «ជាទូទៅ យើងបើកឲ្យគាត់ថ្ងៃទី១០ ប៉ុន្តែ ដោយសារថ្ងៃ១០ហ្នឹង យើងខ្វះខាតលុយ យើងអត់បានបើកឲ្យពួកគាត់ យើងសុំពន្យាពេលគាត់រហូតដល់ថ្ងៃទី១៣ ឬថ្ងៃសៅរ៍ មកដល់ថ្ងៃសៅរ៍ហើយក៏យើងអត់មានលុយបើកឲ្យគាត់ទៀត យើងបានសុំពន្យាគាត់រហូតថ្ងៃអង្គារ។ ថ្ងៃអង្គារហ្នឹងយើងបើកឲ្យគាត់ទាំងអស់»។
ប្រធានសហជីពស៊ីខៅដូប្រចាំរោងចក្រ ហ្វឺស ហ្គាវ័ន្ត លោក ឃឹម មករា បានឲ្យដឹងថា ថៅកែរោងចក្រនេះមិនគោរពច្បាប់ការងារនោះទេ ដោយថា បើកប្រាក់ឈ្នួលឲ្យកម្មករមិនទៀងទាត់ និងមិនបង់ថ្លៃសេវាគាំពារសុខភាព (ប.ស.ស.) ជូនកម្មករឡើយ បើទោះបីបានកាត់លុយពីកម្មករហើយក្តី។
លោកបន្ថែមថា៖ «ក្រៅពីបើកលុយឲ្យកម្មករមិនទៀងទាត់ហើយ ថៅកែរោងចក្រនេះបានកាត់លុយពីកម្មករ ហើយមិនបានបង់ទៅឲ្យ ប.ស.ស.ទេ ហើយពេលកម្មករទៅរកសេវាថែទាំសុខភាព គឺប្រើអត់បានទេ។ អញ្ចឹង វាធ្វើឲ្យប៉ះពាល់ដល់បងប្អូនកម្មករជាពិសេសស្ត្រី»។
វិអូឌីមិនអាចសុំការឆ្លើយតបពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានទេជុំវិញបញ្ហានេះ ដោយទូរសព្ទចូល តែគ្មានអ្នកទទួល។
តំណាងកម្មករឲ្យដឹងថា រោងចក្រ ហ្វឺស ហ្គាវ័ន្ត មានកម្មករសរុប ៣៨០នាក់ ហើយថា ថៅកែរោងចក្រនេះ គឺលោកស្រី ឆា ក្បុងហ៊ី ជាជនជាតិកូរ៉េខាងត្បូង។
កម្មករអះអាងថា លោកស្រី ឆា ក្បុងហ៊ី នេះក៏ជាម្ចាស់រោងចក្រ ហ្គាវ័ន្ត សាខាក្រុងតាខ្មៅផងដែរ ដោយកម្មករធ្វើការនៅសាខានោះក៏កំពុងមានបញ្ហា ដោយថៅកែរូបនេះ បើកលុយមិនទៀងទាត់ និងបានបញ្ឈប់ការកម្មករជិត ៦០០នាក់៕
