រដ្ឋាភិបាលកម្ពុជាបានសម្រេចទម្លាក់ការដោះស្រាយបណ្តឹងក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណៈនិងការគ្រប់គ្រងរដ្ឋបាលថ្នាក់ក្រោមជាតិ ទៅកាន់ថ្នាក់ក្រោម ដោយថាដើម្បីបង្កើនជំនឿទុកចិត្តរបស់ប្រជាពលរដ្ឋនៅមូលដ្ឋានទៅលើការផ្តល់សេវារបស់រដ្ឋ។
ក្នុងអនុក្រឹត្យចុះថ្ងៃទី៨ កុម្ភៈ ដែលវីអូឌីទើបតែទទួល រដ្ឋាភិបាលបានឲ្យដឹងថា ខ្លួនបានសម្រេចបង្កើតការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិ ក្នុងភារៈកិច្ចទទួល ស៊ើប អង្កេត និងការសម្រុះសម្រួល ដោះស្រាយវិវាទនៅរដ្ឋបាលថ្នាក់ក្រោមជាតិ ពាក់ព័ន្ធនឹងបណ្តឹងនៃការផ្តល់សេវាសាធារណៈ របស់រដ្ឋ រួមទាំងបញ្ជូនបណ្តឹងដែលមិនស្ថិតក្នុងដែនសមត្ថកិច្ចរបស់ខ្លួនទៅស្ថាប័នពាក់ព័ន្ធក្នុងការដោះស្រាយផងដែរ។ អនុក្រឹត្យដដែលបានបន្ថែមថា ការិយាល័យថ្នាក់ក្រោមជាតិនោះ និងត្រូវបែងចែកជាការិយាល័យប្រជាពលរដ្ឋរាជធានីខេត្ត និងការិយាល័យ ក្រុង ស្រុក ខណ្ឌ។
ប្រធានលេខាធិការដ្ឋាននៃគណកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ លោក សក់ សេដ្ឋា មានប្រសាសន៍ថា ការសម្រេចផ្ទេរនេះគឺបន្ទាប់ពីមានការដកពិសោធន៍ជាង៦ឆ្នាំនៃការបង្កើតការិយាល័យច្រកចេញចូលតែមួយ ហើយឃើញថាប្រសិទ្ធភាពនៃការបង្កើតនោះគឺអាចឆ្លើយតបទៅនឹងបញ្ហារបស់ប្រជាពលរដ្ឋ។ លោកបន្ថែមថាការិយាល័យនេះគឺមានសមត្ថកិច្ចក្នុងការដោះស្រាយជម្លោះរវាងរាស្ត្រ និងរដ្ឋ។
លោកថា៖ «មានច្រើនដែរ! វាមិនមែនថាជារឿងផ្តល់សេវាទេ ឧបមាថាយើងធ្វើការងារអីមួយប៉ះពារប្រជាជនទៅយើងអាចឲ្យការិយាល័យហ្នឹងជួយ សម្របសម្រួលដោះស្រាយបញ្ហាអ្វីផ្សេងៗដែលប៉ះពាល់ដល់ប្រយោជន៍ប្រជាជននោះណា។ ដូចជាយើងលើកផ្លូវលើកអីៗអញ្ចឹងទៅណា ប៉ះពារគាត់ចឹងទៅ យើងមានគាត់សម្រាប់សម្រុះសម្រួល កាលណាសម្រុះសម្រួលមិនបានមិនមែនបិទសិទ្ធគាត់ទេគាត់អាចដាក់ពាក្យបណ្តឹងទៅតុលាការបាន តែវាជាយន្តការសម្រុះសម្រួលវិវាទឬក៏បណ្តឹងរដ្ឋបាល»។
ទោះជាយ៉ាងណាលោកថា ការបង្កើតការិយាល័យទទួលបណ្តឹងថ្មីនេះមិនមានប្រសិទ្ធភាពក្នុងការទទួលខុសត្រូវលើកវិវាទដីធ្លីដែលកើតមានមុនពេលដែលការិយាល័យនេះបង្កើតនោះទេ ដោយសារវិវាទដីធ្លីដែលកើតឡើងពីមុននោះមានមួយចំនួនធំត្រូវបានធ្លាក់ទៅកាន់ស្ថាប័នថ្នាក់ជាតិក្នុងការដោះស្រាយហើយ។
នាយកប្រតិបត្តិសម្ព័ន្ធគណនេយ្យសង្គមលោក សន ជ័យ យល់ថានេះជាជំហានមួយថ្មីបន្ថែមទៀតរបស់រដ្ឋាភិបាលសម្រាប់បំពេញនូវតម្រូវការរបស់ប្រជាពលរដ្ឋ តែលោកនៅមានការបារម្ភពីប្រសិទ្ធភាពនៃការអនុវត្តយន្តការថ្មីនេះ ដោយសារថវិកាដែលបានបែងចែកទៅថ្នាក់ក្រោមជាតិនៅមានកម្រិតមូយដែលទាបនៅឡើយ។
លោកថា៖ «ចង់ឲ្យរដ្ឋាភិបាលពិនិត្យទៅមើលលើបទពិសោធន៍នៃការអនុវត្តកន្លងមកដូចជាការអនុវត្តច្រកចេញចូលតែមួយ ដែលគេបានធ្វើកិច្ចការល្អ អញ្ចឹងត្រូវតែជារបៀបវារៈមួយដែលពិនិត្យមើលទៅលើការងារកន្លងមក ហើយជាពិសេសបើសិនជាថវិការជាតិដែលមានកាលពីកន្លងមក ហើយបើតាមថវិការជាតិទៅថ្នាក់ក្រោមដូចសព្វថ្ងៃនេះខ្ញុំមិនមានជំនឿរថាមានប្រសិទ្ធភាពថាបានយូរអង្វែងទេ»។
អ្នកជំនាញខាងអភិបាលកិច្ច លោកបណ្ឌិត ចាន់ វិបុល លើកឡើងថាយន្តការនេះគឺធ្វើបានល្អទៅតាមទ្រឹស្តី តែសម្រាប់ការអនុវត្តវិញលោកមើលឃើញថានឹងអាចមានការប្រឈមច្រើន។ លោកលើកឡើងបែបនេះដោយថា អត្តចរិតរបស់មន្ត្រីដែលយល់ថាខ្លួនជាមេរបស់ប្រជាពលរដ្ឋ ហើយបទពិសោធន៍គណនេយ្យភាពពីមុនៗគឺមិនមានសូវជាមានប្រសិទ្ធភាពនោះទេ បូករួមទាំតផ្នត់គំនិតរបស់ប្រជាពលរដ្ឋផងនោះ។
លោកថា៖ «ខ្ញុំយល់ថាទី១គឺត្រូវប្តូរពីប្រព័ន្ធពីសមាមាត្រទៅជាប្រព័ន្ធឯកត្តនាម ទី២ គឺការបណ្តុះបណ្តាលប្រជាពលរដ្ឋឲ្យយល់ច្បាស់អំពីយន្តការ តួនាទីរបស់ប្រជាពលរដ្ឋ និងកាតព្វកិច្ចរបស់រដ្ឋាភិបាល ដែលបានសរសេរក្នុងក្របខណ្ឌមួយដែលគេហៅថាវគ្គបណ្តុះបណ្តាលស្តីពីពលរដ្ឋវិទ្យា និងប្រជាធិបតេយ្យ ទី៣ទៀតគឺត្រូវបង្កើតយន្តការថាមិចដើម្បីជ្រើសរើសមន្ត្រីរាជការដែលមានចរិតស្រលាញ់ពីវិមជ្ឈការ និងវិសហមជ្ឍការហ្នឹងបានគាត់អាចប្រើប្រាស់ប្រព័ន្ធហ្នឹងបាន!» ។
បើតាមប្រធានលេខាធិការដ្ឋាន គ.ជ.អ.ប លោក សក់ សេដ្ឋា បានឲ្យដឹងថា ការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិនេះនឹងត្រូវរដ្ឋាភិបាលរៀបចំបង្កើតនៅទូទាំងប្រទេស ឲ្យបានមុនដំណាច់ឆ្នាំ២០១៧នេះ៕