ក្រសួងអប់រំបានសម្រេចលុបឈ្មោះគ្រូបង្រៀន ៤នាក់នៅខេត្តសៀមរាបចេញពីក្របខ័ណ្ឌមន្រ្តីរាជការ ដោយលើកហេតុផលថា គ្រូបង្រៀនទាំងនោះ អវត្តមានពីការងារដោយគ្មានច្បាប់អនុញ្ញាត ខណៈក្រុមគ្រូបង្រៀនថា ការលុបឈ្មោះពួកគាត់នោះ ត្រូវបានធ្វើឡើងក្រោមហេតុផលនយោបាយ។
ក្នុងសេចក្តីសម្រេចចុះថ្ងៃទី៣០ មករាដូចគ្នា រដ្ឋមន្ត្រីក្រសួងអប់រំ លោក ហង់ ជួនណារ៉ុន បានសម្រេចលុបឈ្មោះ លោក ច័ន្ទ សុភា លោក ហុង សុជា លោក មុត ផល្លា និងលោក ពៀត ម៉ាប់ ចេញពីក្របខ័ណ្ឌមន្ត្រីរាជការនៅក្រសួងអប់រំ ដោយលើក ហេតុផលថា លោកអវត្តមានពីការងារដោយគ្មានច្បាប់អនុញ្ញាត។
លោក មុត ផល្លា ដែលមានតួនាទីជាគ្រូបង្រៀន លោកបានសុំច្បាប់ត្រឹមត្រូវ និងមានច្បាប់អនុញ្ញាតពីមន្ទីរអប់រំខេត្តសៀមរាបផងដែរ។ លោកមានបន្ថែមថា ពួកគាត់ត្រូវបានក្រសួងសម្រេចលុបឈ្មោះចេញពីក្របខ័ណ្ឌមន្ត្រីរាជការបែបនេះ ដោយសារតែពួកគាត់ជាសកម្មជន និងជាអ្នកគាំទ្របក្សប្រឆាំង។
លោកបន្ថែមថា៖ «ទី២ការធ្វើបែបនេះ ខ្ញុំយល់ឃើញថា វាមិនមែនជាចេតនាបែបរដ្ឋបាល ឬការងារបច្ចេកទេសទេ វាជាឆន្ទៈបែបនយោបាយច្រើនជាង ពីព្រោះ ខ្ញុំជាអ្នកនយោបាយនៅថ្នាក់មូលដ្ឋាន[អ្នកគាំទ្រគណបក្សសង្គ្រោះជាតិ] ហើយខ្ញុំជាប្រធានប្រតិបត្តិខេត្តសៀមរាបផង និងសមាជិកក្រុមប្រឹក្សាខេត្តជាប់ឆ្នោតផង។ ដូច្នេះហើយ ខ្ញុំគិតថា ការលុបឈ្មោះនេះរបៀបជាស្តង់ដារជារឿងនយោបាយច្រើនជាង»។
ជាបុគ្គលិកអប់រំបម្រើការងារនៅសាលាគរុកោសល្យខេត្តសៀមរាប និងជាអតីតអនុប្រធានគណៈកម្មការប្រតិបត្តិខេត្តនៃគណបក្សសង្គ្រោះជាតិ លោក ពៀត ម៉ាប់ និយាយថា ការលុបឈ្នោះពួកគាត់ទាំង ៤នាក់ចេញពីក្របខណ្ឌមន្រ្តីរាជការនេះ គឺជារឿងអយុត្តិធម៌ ដោយថា ពួកគាត់មិនបានធ្វើខុសពីលក្ខខន្តិកៈមន្រ្តីរាជការនោះទេ។
លោក ពៀត ម៉ាប់ ឲ្យដឹងថា ក្រោយគណបក្សសង្គ្រោះជាតិត្រូវបានគេរំលាយពីរបីថ្ងៃ មន្រ្តីគណបក្សប្រជាជនកម្ពុជាប្រចាំខេត្តសៀមរាបបានមកបញ្ចុះបញ្ចូលឲ្យពួកគាត់ចុះចូលជាមួយគណបក្សប្រជាជនកម្ពុជា ប៉ុន្តែ ពួកគាត់បដិសេធ ដោយថា មិនចង់ក្បត់ឆន្ទៈពលរដ្ឋ។
លោកបន្ថែមថា៖«អញ្ចឹង ពួកខ្ញុំសុំឲ្យក្រសួងអប់រំពិនិត្យមើលឡើងវិញអំពីសេចក្តីសម្រេចរបស់គាត់ហ្នឹង តើវាត្រឹមត្រូវតាមផ្លូវច្បាប់ គតិយុត្តិឬអត់? បើសិនមានការស្តីបន្ទោស និងមានការព្រមានផ្សេងៗហ្នឹងបានចូលដល់តំណាក់កាលលុប ព្រោះក្របខណ្ឌនេះ មិនមែនក្របខណ្ឌនយោបាយទេ គឺក្របខណ្ឌមន្រ្តីរាជការនៃប្រទេសនីមួយៗហ្នឹង ដែលកើតឡើងដោយសារការប្រឡង កើតឡើងដោយសារការខិតខំរៀនសូត្រ អត់មានកើតឡើងដោយសារការធ្វើនយោបាយទេ ខ្ញុំបញ្ជាក់អញ្ចឹង ហើយសូមអំពាវនាវទៅអង្គការនានាជួយអន្តរាគមន៍ឲ្យពួកខ្ញុំបាននៅក្របខណ្ឌដើមវិញ»។
ពេលដែលវីអូឌីសាកសួរជុំវិញបញ្ហានេះ អ្នកនាំពាក្យក្រសួងអប់រំយុវជន និងកីឡា លោក រស់ សាលីន បានប្រាប់ថា លោកសុំពិនិត្យរឿងរ៉ាវនោះសិន មុនឆ្លើយតបជាមួយអ្នកសាព័ត៌មាន ហើយលោកក៏បានបិទទូរស័ព្ទតែម្តង។
កាលពីថ្ងៃទី៣០មករានេះដែរ ក្រសួងអប់រំបានសម្រេចច្រានចោលពាក្យសុំបម្រើការងារ និងលុបឈ្មោះ លោក រ៉ុង ឈុន អតីតសមាជិកមួយរូប គ.ជ.ប.មកពីកូតាគណបក្សសង្គ្រោះជាតិ ចេញពីក្របខ័ណ្ឌមន្ត្រីរាជការ ដោយលើកហេតុផលថា លោកអវត្តមានពីការងារដោយគ្មានច្បាប់អនុញ្ញាត ដែលការសម្រេចនេះ ត្រូវបានធ្វើឡើងតែប៉ុន្មានខែប៉ុណ្ណោះ បន្ទាប់ពីលោកលាលែងពីសមាជិក គ.ជ.ប.។
លោក រ៉ុង ឈុន ចាត់ទុកការបញ្ឈប់រូបលោកពីក្របខ័ណ្ឌនេះ គឺធ្វើឡើងក្រោមហេតុផលនយោបាយច្រើនជាង៕
