មនុស្សដល់ទៅជិត ៥៥០០នាក់ ត្រូវបានសមត្ថកិច្ចចាប់ខ្លួន នៅក្នុងយុទ្ធនាការបង្ក្រាបគ្រឿងញៀននៅទូទាំងប្រទេសកម្ពុជា ក្នុងរយៈពេល ២ខែកន្លះកន្លងមកនេះ។
របាយការណ៍បង្ក្រាបគ្រឿងញៀន ដែលត្រូវបានផ្សាយលើវេបសាយនគរបាលជាតិកម្ពុជា បានឲ្យដឹងថា សមត្ថកិច្ចកម្ពុជា បានបង្ក្រាបគ្រឿងញៀនដល់ទៅ ២៣៩៣ករណី នៅទូទាំងប្រទេស គិតចាប់ពីថ្ងៃទី០១ ខែមករា រហូតមកដល់ថ្ងៃទី១៤ ខែមីនានេះ ដោយរឹបអូសគ្រឿងញៀនបានជាង ២០គីឡូក្រាម និង ៣១១១កញ្ចប់ និងឃាត់ខ្លួនមនុស្សបាន ៥៤៩០នាក់ ក្នុងនោះមានស្ត្រី ៥៥៩នាក់។
របាយការណ៍របស់សមត្ថកិច្ច បានបង្ហាញលម្អិតថា សមត្ថកិច្ចបង្ក្រាបបទល្មើសគ្រឿងញៀនបាន ១១៤៤ករណី កាលពីខែមករាកន្លងមក មុននឹងការបង្ក្រាបបទល្មើសគ្រឿងញៀន ធ្លាក់មកនៅត្រឹម ៩២១ករណី នៅខែកុម្ភៈកន្លងមកនេះ។
នៅក្នុងយុទ្ធនាការបង្ក្រាបគ្រឿងញៀនទាំងនោះ សមត្ថកិច្ចបានឃាត់ខ្លួនមនុស្សដល់ទៅ ២៧៧៣នាក់ កាលពីខែមករា មុននឹងឃាត់ខ្លួនមនុស្ស ២០៥៣នាក់ទៀត នៅខែកុម្ភៈកន្លងមក៕
