ប្រជាពលរដ្ឋចំនួន៦សហគមន៍រស់នៅតាមបណ្តោយផ្លូវរថភ្លើងក្នុងរាជធានីភ្នំពេញបានប្រមូលផ្តុំនិងយកញត្តិដាក់សាលារាជធានីភ្នំពេញ ដោយថាទាមទារឲ្យមន្ត្រីស្ថាប័ននេះ ពន្យល់ឲ្យច្បាស់ពីគម្រោងអភិវឌ្ឍន៍ផ្លូវរថភ្លើងនៅតំបន់នោះ ខណៈពួកគេព្រួយបារម្ភពីការបណ្តេញចេញដោយបង្ខំដូចសហគមន៍ដទៃ។
សហគមន៍ទំាងនោះរួមមាន សហគមន៍អភិវឌ្ឍន៍ថ្មី សហគមន៍រួមចិត្តតែមួយ សហគមន៍ភូមិ១៧ សហគមន៍ភូមិ១០៤ សហគមន៍ភូមិ១០៥ សហគមន៍ភូមិ២ ស្ថិតនៅខណ្ឌដូនពេញ និងខណ្ឌទួលគោក រាជធានីភ្នំពេញ។
ប្រជាសហគន៍ភូមិ១៧ លោក នូ សារិន បានថ្លែងប្រាប់អ្នកយកព័ត៌មានបន្ទាប់ពីចូលដាក់ញត្តិនៅសាលារាជធានីភ្នំពេញថា លោកមិនជំទាស់នឹងគម្រោងអភិវឌ្ឍន៍នៅតាមបណ្តោយផ្លូវរថភ្លើងនោះទេ ប៉ុន្តែលោកបង្ហាញជាចម្ងល់ថា មន្ត្រីថ្នាក់ក្រោមបានលើកឡើងខុសគ្នា និងផ្ទុយពីប្រសាសន៍របស់លោកនាយករដ្ឋមន្ត្រីហ៊ុន សែន ដែលថាលុបគម្រោងអភិវឌ្ឍន៍នៅតំបន់នោះផងដែរ។ លោកបញ្ជាក់ថា «បច្ចុប្បន្ននេះអភិបាលខ័ណ្ឌលោកមានប្រសាសន៍ផ្សេង១០ម៉ែត្រកន្លះ មកឯកឧត្តម ប៉ា សុជាតិវង្ស អភិបាលគណៈអភិបាលរាជធានីភ្នំពេញលោកចុះផ្ទាល់គាត់ថា១៥ម៉ែត្រទៅ២០ម៉ែត្រ អញ្ចឹងសួរថាបងប្អូនខ្ញុំមានការបារម្ភឬអត់ ព្រោះផ្លូវនេះសម្តេចគាត់បានលុបគម្រោងចោលរួចហើយ តែអត់មានការលុបគម្រោងបានប៉ុន្មានផងមានការផ្ទុះ បងប្អូនខ្ញុំគំាទ្រគម្រោងអភិវឌ្ឍន៍របស់រាជរដ្ឋាភិបាលមិនធ្វើឲ្យរំាងស្ទះទេ ប៉ុន្តែស្នើសុំឲ្យរាជរដ្ឋាភិបាលលោករកដំណោះស្រាយណាមួយសមស្របជាមួយបងប្អូនប្រជាពលរដ្ឋ»។
ប្រជាសហគមន៍ម្នាក់ទៀត អ្នកស្រី នី សន្តោស បានរៀបរាប់ថា ប្រជាសហគមន៍រាប់រយគ្រួសារដែលកំពុងប្រឈមនឹងផលប៉ះពាល់លើគម្រោងអភិវឌ្ឍន៍បណ្តោយផ្លូវរថភ្លើង។ អ្នកស្រីថា ពួកគេចង់ឲ្យរដ្ឋាភិបាលធ្វើការអភិវឌ្ឍន៍នៅនិងកន្លែង ឬអ្នកដែលរងប៉ះពាល់អាចជម្លៀសពួកគេចេញពីកន្លែងនោះ២ទៅ៣គីឡូម៉ែត្រពីតំបន់អភិវឌ្ឍន៍នោះ ដោយថា កុំឲ្យប៉ះពាល់ដល់ជីវភាពគ្រួសារពួកគេ។
មន្ត្រីរដ្ឋបាលនៅសាលារាជធានីភ្នំពេញលោក កុសល បានអះអាងថា គាត់ទទួលយកញត្តិពីប្រជាសហគមន៍ទំាងនោះដែលស្នើសុំជួបជជែកជាមួយអភិបាលរាជធានី លោក ប៉ា សុជាតិវង្ស នៅថ្ងៃ២៨មីនា វេលាម៉ោង៩ព្រឹក ប៉ុន្តែលោកថា និងសំណើរនេះជម្រាបទៅថ្នាក់លើនិងជូនដំណឹងទៅពួកគេនៅពេលក្រោយ។
ប្រធានក្រុមការងារពិសេសសិទ្ធិលំនៅឋានលោក សៀ ភារម្យ យល់ថា បើមន្ត្រីរដ្ឋាភិបាលមិនធ្វើការដោះស្រាយបញ្ហានេះឲ្យមានតម្លភាព នឹងធ្វើឲ្យពលរដ្ឋរិះគន់លើការដឹកនាំរបស់រដ្ឋាភិបាលដូចកាលពីអតីតកាលផងដែរ។លោកនិយាយថា «បើសិនជាយើងធ្វើឲ្យគាត់មានភាពរញ៉េរញ៉ៃ ហើយប្រជាពលរដ្ឋនៅតែចេញតវ៉ា ប្រជាពលរដ្ឋគេអាចចេញចោទប្រកាន់ថាអាជ្ញាធរមិនមានសមត្ថភាពក្នុងការដោះស្រាយបញ្ហា សុខមាលរបស់ប្រជាពលរដ្ឋ យើងគួរតែបញ្ចៀសបញ្ហាហ្នឹង យើងគួរតែធ្វើការអភិវឌ្ឍឲ្យមានការពេញចិត្តពេញថ្លើម ពីប្រជាពលរដ្ឋទៅ បានប្រជាពលរដ្ឋលោកមានការគំាទ្រ ឬក៏ស្រលាញ់រដ្ឋាភិបាល កុំឲ្យដូចអតីតកាល»។
កន្លងទៅការអភិវឌ្ឍនៅក្នុងរាជធានីភ្នំពេញមានការបណ្ដេញពលរដ្ឋចេញពីលំនៅស្ថានមានដូចជា បឹងកក់ បុរីកីឡា ដីក្រហម សំបុកចាប ដោយបើកផ្លូវឲ្យក្រុមហ៊ុនចូលអភិវឌ្ឍ ហើយមកដល់ពេលនេះអ្នកខ្លះមិនទាន់បានសំណងនៅឡើយ៕
