យ៉ាងហោចណាស់ មនុស្ស២នាក់បានស្លាប់ ក្នុងនោះមានបរទេសម្នាក់ និង៣នាក់ទៀតរងរបួស ក្នុងករណីផ្ទុះគ្រាប់បែកនៅទីលានហាត់ឯកជន ក្នុងតំបន់បន្ទាយទាហាន ACO ស្ថិតនៅភូមិក្រឡាញ់ ឃុំមហាសាំង ស្រុកភ្នំស្រួចខេត្តកំពង់ស្ពឺ។ នេះបើតាមអ្នកនាំពាក្យក្រសួងការពារជាតិលោក ឈុំ សុជាតិ។
បើតាមលោក ឈុំ សុជាតិ ហេតុការណ៍ផ្ទុះគ្រាប់បែកនោះ កើតឡើងនៅវេលាម៉ោងប្រមាណ៣រសៀសថ្ងៃទី១៥មីនានេះ ដោយថា នៅមិនទាន់ដឹងច្បាស់ពីមូលហេតុពិតប្រាកដនៃការផ្ទុះនោះនៅឡើយទេ។
លោកថា៖ «គ្រាន់តែខ្ញុំសួរទៅខាងហ្នឹងគេថា គ្រាប់ហ្នឹងអត់ផ្ទុះ ដល់ពេលទៅរើសទៅក៏ផ្ទុះទៅ ហើយព័ត៌មានអំបាញ់មិញថា បោកគ្រាប់បែក ហាត់បោកគ្រាប់បែក បាញ់គ្រាប់ពិតប្រាកដ តែគ្រាន់តែដឹងថា ផ្ទុះប៉ុហ្នឹងសិនចុះ! យ៉ាងមិច យ៉ាងណាចាំថែមទៀតនេះ ជាព័ត៌មានបឋមសិន» ។
លោក ឈុំ សុជាតិ បន្ថែមថានៅពេលនេះ ទាំងសាកសពនិងអ្នករបួស ត្រូវបានបញ្ជូនទៅមន្ទីរពេទ្យខេត្តកំពង់ស្ពឺ ហើយព័ត៌មានបន្ថែមយ៉ាងណា លោកនឹងជូនជាព័ត៌មាននាពេលក្រោយ។