ប្រធានតុលាការកំពូលនេប៉ាល់ លោក ហ្កូប៉ាល់ ប៉ារ៉ាជូលី ត្រូវបានទម្លាក់ចេញពីតំណែងកាលពីថ្ងៃម្សិលមិញនេះ ក្រោមការចោទថា បានក្លែងបន្លំថ្ងៃខែឆ្នាំកំណើតរបស់ខ្លួន ដើម្បីបន្តកាន់តំណែងបានយូរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
AFP បានចុះផ្សាយបន្តថា រឿងចម្រូងចម្រាស់ជុំវិញថ្ងៃខែឆ្នាំកំណើតរបស់លោក ប៉ារ៉ាជូលី បានផ្ទុះឡើងច្រើនខែមកហើយ បន្ទាប់ពីលោកចោទប្រកាន់ទៅលើសកម្មជនដ៏ល្បីម្នាក់ និងកាសែតដ៏ធំនៅនេប៉ាល់ថា មិនបានគោរពតុលាការជុំវិញការលើកឡើងនូវក្ដីបារម្ភអំពីថ្ងៃខែឆ្នាំកំណើតដ៏ច្រើនរបស់មេតុលាការកំពូលរូបនេះ។
ក្រុមប្រឹក្សាចៅក្រមមួយ បានសម្រេចថា លោក ប៉ារ៉ាជូលី គួរតែចូលនិវត្តន៍តាំងពី ៧ខែមុនម៉្លេះ នៅពេលលោកឈានដល់អាយុ ៦៥ឆ្នាំ ដែលជាអាយុចូលនិវត្តន៍សម្រាប់តំណែងមន្ត្រីរដ្ឋការនៅប្រទេសនេប៉ាល់។
លេខាធិការក្រុមប្រឹក្សាចៅក្រម លោក នរីបឌូជ នីរូឡា ត្រូវបាន AFP ដកស្រង់សម្ដីចុះផ្សាយថា លោក ប៉ារ៉ាជូលី ត្រូវបានទម្លាក់ពីតំណែង បន្ទាប់ពីអាយុចូលនិវត្តន៍របស់លោកត្រូវបានរកឃើញថា កោសលុបនៅក្នុងការស៊ើបអង្កេតមួយកាលពីខែសីហា។
សេចក្ដីសម្រេចនេះ បានកើតឡើងភ្លាមៗ មុនពេលលោក ប៉ារ៉ាជូលី ចូលរួមក្នុងពិធីស្បថចូលកាន់តំណែងរបស់ប្រធានាធិបតីនេប៉ាល់ លោក ពិត្យា បានដារី ដែលជាប់ឆ្នោតអាណត្តិទី២កាលពីថ្ងៃអង្គារកន្លងមកនេះ៕
