នាយករដ្ឋមន្ត្រីអង់គ្លេសលោក David Cameron កាលពីថ្ងៃសៅរ៍ម្សិលមិញ បានចាប់ផ្តើមធ្វើយុទ្ធនាការរបស់លោក ដើម្បីឲ្យប្រជាពលរដ្ឋសម្រេចចិត្តបន្តនៅក្នុងសហភាពអឺរ៉ុប(EU)បន្តទៀត ដើម្បីផលប្រយោជន៍ជាតិ។
លោក David Cameron លើកឡើងថា បើអង់គ្លេសចាកចេញពីសហភាពអឺរ៉ុបនឹងជួបបញ្ហាច្រើនគឺ ប៉ះពាល់ដល់សេដ្ឋកិច្ច ព្រោះអង់គ្លេសបានវិនិយោគនៅក្នុងតំបន់នេះ រាប់ពាន់លានផោន។ នេះបើតាមសារព័ត៌មានChannel News Asia។
លោក Cameron កំពុងធ្វើយុទ្ធនាការ ដើម្បីនយោបាយទៅថ្ងៃអនាគតរបស់លោក ដែលគេនឹងធ្វើប្រជាមតិនៅថ្ងៃទី២៣ ខែមិថុនា ដើម្បីសម្រេចថា តើពលរដ្ឋអង់គ្លេសភាគច្រើនចង់នៅ ឬចង់ចាកចេញពីសហភាពអឺរ៉ុប។ លោកថ្លែងថា ប្រជាជនអង់គ្លេសគួរបោះឆ្នោតបន្តនៅក្នុងសហភាពអឺរ៉ុប។
ទន្ទឹមនឹងនេះ លោក Jeremy Corbyn មេដឹកនាំគណបក្សប្រឆាំង គឺគណបក្សការងារ បានរៀបចំការប្រមូលផ្តុំទ្រង់ទ្រាយធំមួយនៅក្នុងទីក្រុងឡុងដើម្បីយុទ្ធនាការនេះ។
លោក Cameron និង Corbyn គឺជាដៃគូរប្រជែងនយោបាយដ៏ធំបំផុត ប៉ុន្តែពួកគេទាំងពីរធ្វើយុទ្ធនាការជាទ្រង់ទ្រាយធំរួមគ្នា ដើម្បីឲ្យប្រជាពលរដ្ឋសម្រេចបោះឆ្នោតដាក់ប្រទេសស្ថិតនៅក្នុងសហភាពអឺរ៉ុបបន្តទៀត។