អាជីវករខ្មែរដែលនាំបន្លែផ្លែឈើពីថៃប្រមាណ៣០នាក់ផ្ទុះការតវ៉ានៅច្រកព្រំដែនអន្តរជាតិព្រំជាប់ព្រំប្រទល់ខេត្តប៉ៃលិនរបស់កម្ពុជា និង ខេត្តចាន់បុរីរបស់ថៃ ដោយចោទថា មន្ត្រីគយកម្ពុជាគាបសង្កត់ទារលុយពីពួកគាត់ ខណៈប្រាក់ចំនេញរកបានតិចតួច។
តាមការចុះផ្សាយរបស់អគ្គស្នងការដ្ឋាននគរបាលជាតិបានឲ្យដឹងថា កាលពីព្រឹកថ្ងៃពុធម្សិលមិញ អាជីវករនាំបន្លែផ្លែឈើចូលពីថៃតវ៉ា ចោទថា ថ្មីៗនេះ មន្ត្រីគយកម្ពុជាទារប្រាក់ពីពួកគាត់ដែលដឹកបន្លែ១ម៉ូតូពី១ម៉ឺនទៅ២ម៉ឺនរៀល។ ពួកគាត់ថា បច្ចុប្បន្នទទួលបានប្រាក់ចំនេញតិច បើមានការទារប្រាក់បែបនេះ ធ្វើឲ្យជីវភាពពួកគាត់កាន់តែជួបការលំបាក។
ពលរដ្ឋតវ៉ាអះអាងថា ប្រធានគយមុនមិនយកប្រាក់ទេ សម្រាប់ការដឹកបន្លែតិចតួច ប៉ុន្តែមន្ត្រីគយក្រោយនេះបែរជាតម្រូវឲ្យបង់ប្រាក់ទោះបន្លែតិចតួចក្តី។
ប្រធានគណៈកម្មការច្រកអន្តរជាតិព្រំ លោក សុខ ដាវុធ ថ្លែងថា ការទារលុយនោះគឺជាកិច្ចការរបស់មន្ត្រីគយ ទោះយ៉ាងណាលោកថា បញ្ហានេះបានដោះស្រាយរួចរាល់អស់ហើយ៕