អតីតប្រធានាធិបតីហ្វីលីពីនប្រឈមការចោទប្រកាន់ជុំវិញការដឹកនាំខ្ជីខ្ជា

ដោយ លោក សូរ្យ ជ័យឧត្ដម​​ | ថ្ងៃសៅរ៍ ទី១៥ ខែកក្កដា ឆ្នាំ២០១៧​ ម៉ោង 1:22 PM | អន្តរជាតិ | 0 | 5041

អតីត​ប្រធានាធិបតី​ហ្វីលីពីន លោក បេនីកណូ អាហ្គីណូ នឹង​ត្រូវ​បាន​ចោទ​ប្រកាន់​នៅ​ក្នុង​តុលាការ ជុំ​វិញ​​ការ​បង្ក្រាប​អំពើ​ភេរវកម្មដ៏​ខ្ជីខ្ជា ដែល​បាន​បណ្ដាល​ឲ្យ​មន្ត្រី​ប៉ូលិស​ឆ្នើម ៤៤​នាក់ ស្លាប់​ កាល​ពី​ឆ្នាំ​២០១៥។ នេះ​ដោយ​យោង​តាម​ការ​ចុះផ្សាយ​របស់​ទីភ្នាក់ងារ​ព័ត៌មាន AFP ដោយ​បាន​ដក​ស្រង់​សម្ដី​រដ្ឋ​អាជ្ញា​រដ្ឋាភិបាល​ពិសេស​មួយ​រូប។

ការិយាល័យ​ស៊ើប​អង្កេត​របស់​រដ្ឋាភិបាល បាន​និយាយ​ថា លោក អាហ្គីណូ ដែល​បាន​ចប់​អាណត្តិ​ដឹកនាំ​ប្រទេស ៦​ឆ្នាំ​​កាល​ពី​ឆ្នាំ​មុន​នោះ ត្រូវ​បាន​ចោទ​ប្រកាន់​ថា​ បាន​ដណ្ដើម​អំណាច និង​អនុញ្ញាត​ឲ្យ​មេ​ប៉ូលិស​ លោក អាឡាំង ពូរីស៊ីម៉ា ដែល​ត្រូវ​បាន​ដក​បញ្ឈរ​ជើង​ហើយ​នោះ ឲ្យ​ដឹកនាំ​កង​កុម្ម៉ង់ដូ ធ្វើ​ប្រតិបត្តិការ​​បង្ក្រាប​ដ៏​បង្ហូរ​ឈាម​មួយ​កាល​ពី​ខែ​មករា ឆ្នាំ​២០១៥។

លោក អាហ្គីណូ អាច​ប្រឈម​មុខ​ជាប់​គុក​ជាច្រើន​ឆ្នាំ​ ​ប្រសិនបើ​រក​ឃើញ​ថា​មាន​ទោស​នោះ ប៉ុន្តែ ភ្លាមៗ​នេះ អ្នក​សារព័ត៌មាន​ពុំ​អាច​ទាក់​ទង​លោក​ឲ្យ​បញ្ជាក់​អំពី​រឿង​នេះ​បាន​ទេ។ ជំនួយការ​របស់​លោក អាហ្គីណូ បាន​ប្រាប់​អ្នក​សារព័ត៌មាន​ថា លោក អាហ្គីណូ នឹង​ជជែក​ជាមួយ​មេធាវី​របស់​លោក​អំពី​បញ្ហា​នេះ៕

សរសេរមកកាន់ លោក សូរ្យ ជ័យឧត្ដម តាមរយៈ oudom@vodhotnews.com

ចាប់អារម្មណ៍នឹងព័ត៌មានប្រភេទនេះ? ចុះឈ្មោះដើម្បីទទួលបានព័ត៌មានថ្មីៗ

Fields marked with an * are required