យ៉ាងហោចណាស់មនុស្ស ៦នាក់ ត្រូវបានសម្លាប់ ហើយ ១៣នាក់ទៀតបានរងរបួសធ្ងន់ស្រាល នៅក្នុងគ្រោះថ្នាក់ចរាចរណ៍ត្រឹមតែមួយថ្ងៃម្សិលមិញនេះ។ នេះដោយយោងតាមរបាយការណ៍គ្រោះថ្នាក់ចរាចរណ៍នគរបាលជាតិ។
របាយការណ៍ដដែលនេះ បានបន្ថែមថា គ្រោះថ្នាក់ចរាចរណ៍ ១២ករណី បានកើតឡើងនៅទូទាំងប្រទេសកាលពីថ្ងៃម្សិលមិញនេះ ដោយបានសម្លាប់មនុស្ស ៦នាក់ និងបណ្ដាលឲ្យរងរបួស ១៣នាក់ ក្នុងនោះ ៩នាក់រងរបួសធ្ងន់។
របាយការណ៍នេះបានឲ្យដឹងថា នៅក្នុងរយៈពេល ១៤ថ្ងៃកន្លងមកនេះ គ្រោះថ្នាក់ចរាចរណ៍បានសម្លាប់មនុស្សដល់ទៅ ៦៦នាក់ហើយ និងបណ្ដាលឲ្យរងរបួស ២១៣នាក់ នៅទូទាំងប្រទេស។ គ្រោះថ្នាក់ចរាចរណ៍បានសម្លាប់មនុស្សជាង ១៧០០នាក់ និងបណ្ដាលឲ្យមនុស្សជាង ៦៦០០នាក់រងរបួស កាលពីឆ្នាំមុន៕
