លោកនាយករដ្ឋមន្ត្រី ហ៊ុន សែន នៅថ្ងៃសុក្រទី១៥កញ្ញានេះថ្លែងថា រដ្ឋាភិបាលកម្ពុជាក្រោមការដឹកនាំរបស់លោកមិនបានបិទសារព័ត៌មាន ខេមបូឌា ដេលី នោះទេ គឺលោកថាសារព័ត៌មាននេះមិនបង់ពន្ធទៅតាមច្បាប់ ហើយសម្រេចបិទការផ្សាយដោយខ្លួនឯង។
នៅក្នុងពិធីជួបជាមួយកម្មករនៅព្រឹកនេះ លោកនាយករដ្ឋមន្ត្រី ហ៊ុន សែន បានច្រានចោលការចោទប្រកាន់នានាដែលថា កម្ពុជាជាអ្នកបិទសារព័ត៌មាន ខេមបូឌា ដេលី ផ្សាយជាភាសាអង់គ្លេស ជាកម្មសិទ្ធិរបស់ជនជាតិអាមេរិក។
នៅវេទិកាជួបជាមួយសកម្មជនការពារបរិស្ថាននៅពេលថ្មីៗនេះ លោកនាយករដ្ឋមន្ត្រី ហ៊ុន សែន ធ្លាប់ហៅសារព័ត៌មាន ខេមបូឌា ដេលី ថាជាមេចោរ ហើយលោកថា បើកាសែតមួយនេះ មិនព្រមបង់ពន្ធតាមការទាមទាររបស់រដ្ឋាភិបាលប្រមាណ៦,៣លានដុល្លារនោះទេ គឺត្រូវបិទ។
កាសែត ខេមបូឌា ដេលី សម្រេចបិទសា្ថប័នរបស់ខ្លួនកាលពីថ្ងៃទី៤ខែកញ្ញា តាមការកំណត់របស់រដ្ឋាភិបាល។ ម្ចាស់កាសែតនេះ គឺលោកស្រី Deborah Krisher-Steele ជាជនជាតិអាមេរិកថ្លែងថា ការសម្រេចរបស់រដ្ឋាភិបាលមិនមែនជារឿងពន្ធដារនោះទេ គឺថាជារឿងនយោបាយ ដោយសារកាសែតនេះ តែងតែសរសេរពីភាពខ្វះចន្លោះពីរដ្ឋាភិបាល៕