នាយករដ្ឋមន្ត្រីកម្ពុជា លោក ហ៊ុន សែន បានច្រានចោលថា លោកមិនបានចោទសហរដ្ឋអាមេរិកថា ជាអ្នកនៅពីក្រោយបក្សប្រឆាំង ចង់ផ្តួលរំលំរបបដឹកនាំរបស់លោកនោះទេ ដោយថា លោក កឹម សុខា ទៅវិញទេ ជាអ្នកចោទប្រកាន់សហរដ្ឋអាមេរិកបែបនេះ។
ស្ថានទូតអាមេរិកកាលពីថ្ងៃទី១២ខែកញ្ញា បានច្រានចោលថា សហរដ្ឋអាមេរិក មិនបាននៅពីក្រោយគណបក្សសង្គ្រោះជាតិ ដើម្បីរៀងចំផែនការណ៍ផ្តួលរំលំរដ្ឋាភិបាលកម្ពុជា ដូចដែលរដ្ឋាភិបាលកម្ពុជាចោទប្រកាន់ អំឡុងពេលចុះឆ្មក់ចាប់ខ្លួនមេបក្សប្រឆាំងលោក កឹម សុខា នោះទេ និងបានជំរុញឲ្យដោះលែងមេបក្សរូបនេះ ជាបន្ទាន់ទៀតផង។
ប៉ុន្តែក្នុងពិធីជួបសំណេះសំណាលជាមួយកម្មករ ក្នុងរាជធានីភ្នំពេញ នាថ្ងៃសុក្រនេះ លោក ហ៊ុន សែន ថ្លែងថា រដ្ឋាភិបាល មិនបានចោទប្រកាន់អាមេករិកទេ។ តែលោកថា លោក កឹម សុខា នៅតែមានទោសថា «ក្បត់ជាតិ» ដែលលោកថា មិនអាចអត់ឱនឲ្យបាន។
លោកថា៖ «យើងមិនបានចោទប្រកាន់សហរដ្ឋអាមេរិកទេ។ ប៉ុន្តែ កឹម សុខា ទេ ជាអ្នកចោទអាមេរិក ដែលបានណែនាំអំពីវិធីផ្តួលរំលំ ផ្លាស់ប្តូរ តាមរបៀបនៅយូកូស្លាវី និងសែកប៊ី ហើយបញ្ជូនសាស្ត្រាចារ្យមកអនុវត្តនៅកម្ពុជា។ តើមែនឬមិនមែន? តើ កឹម សុខា ចោទអាមេរិក ឬអាមេរិកចោទ កឹម សុខា»។
ប៉ុន្តែ លោក ហ៊ុន សែន កាលពីថ្ងៃទី៤ខែកញ្ញា ក្នុងពិធីសម្ពោធដាក់ប្រើប្រាស់វិហាឥស្លាម នៅខេត្តកំពង់ចាម បានថ្លែងថា ប្រទេសដែលចេញសេចក្តីថ្លែងការថ្កោលទោស ចំណាត់ការចាប់ខ្លួនលោក កឹម សុខា ថាប្រទេសទាំងនោះ គ្រាន់តែការពារអាយ៉ងរបស់ខ្លួន និងបានរំឭកពីអាមេរិកធ្លាប់ទម្លាក់ក្រោមបែកនៅកម្ពុជា អំឡុងទសវត្ស៧០។
លោកថា៖ «តម្រូវការមុនគេ គឺការរក្សាសន្តិភាពឲ្យខានតែបាន ទោះដោយតម្លៃណាក៏ដោយ មិនអាចឲ្យបរទេសមកប្រើប្រាស់ជនជាតិខ្មែរ ដើម្បីសម្លាប់ខ្មែរតទៅទៀតទេ»។
ក្រោយចាប់ខ្លួនមេដឹកនាំបក្សប្រឆាំង សហគមន៍អន្តរជាតិ មានសហភាពអឺរ៉ុប អង់គ្លេស បារាំង អូស្ត្រាលី អាល្លឺម៉ង់ និងសហរដ្ឋអាមេរិកផងនោះ បានជំរុញឲ្យដោះលែងមេដឹកនាំបក្សប្រឆាំង ដោយថា ចំណាត់ការចាប់ខ្លួននោះ បានរំលោភអភ័យឯកសិទ្ធិសភា និងថាជាការគំរាមកំហែងផ្នែកនយោបាយ។
អ្នកវិភាគនយោបាយ លោក ឯម សុវណ្ណារ៉ា វិភាគថា សារនយោបាយ ដែលបង្កើនកម្តៅជាមួយសហគមន៍អន្តរជាតិ លោកថា មិនបានចំណេញដល់កម្ពុជាទេ។
លោកថា៖ «ភាគីរដ្ឋាភិបាលកម្ពុជា និងសហគមន៍អន្តរជាតិហ្នឹងអង្គុយតុជាមួយគ្នា ចរចាគ្នានូវអ្វីដែលយល់មិនដូចគ្នា។ អញ្ចឹងមធ្យោបាយតែមួយតាមការចរចាហ្នឹង គឺវាប្រសើជាងអ្វីទាំងអស់ ហើយបើសិនជាគ្រាន់តែសម្តែងមតិប្រតិកម្មចុះប្រតិកម្មឡើង វាអត់មានស្អីចេញរួចទេ ច្រកនយោបាយកម្ពុជានៅតែតានតឹង ហើយអ្វីដែលអូសបន្លាយកាន់តែយូរ រឿងរាវកើតឡើងកាន់តែច្រើន កម្ពុជាជាអ្នកខាតបង់ មិនមែនសហគមន៍អន្តរជាតិទេ»។
យ៉ាងណាក៏ដោយលោក ហ៊ុន សែន បានអះអាងថា កម្ពុជាមិនចង់រករឿងសហរដ្ឋអាមេរិកទេ តែលោកថា អាមេរិក ក៏មិនត្រូវលូកដៃក្នុងកិច្ចការផ្ទៃក្នុងរបស់កម្ពុជាដែរ។ ប៉ុន្តែករណីនេះ អ្នកវិភាគថា សហរដ្ឋអាមេរិក និងប្រទេសលោកសេរីមួយចំនួនទៀត ដែលបានចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស ពួកគេ មានកាតព្វកិច្ចជំរុញដំណើរការវិវឌ្ឍនៃលទ្ធិប្រជាធិបតេយ្យនៅកម្ពុជា៕
