កូរ៉េខាងជើងនៅព្រឹកថ្ងៃសុក្រនេះ បានបាញ់មីស៊ីលរំលងប្រទេសជប៉ុននៅត្រង់កោះភាគខាងជើងគឺកោះ Hokkaido ហើយហោះទៅធ្លាក់នៅក្នុងមហាសមុទ្រប៉ាស៊ីហ្វិក ដែលសកម្មភាពនេះធ្វើឲ្យមានការខឹងសម្បារកាន់តែខ្លាំងពីមេដឹកនាំជប៉ុន។
ប្រធានគណៈរដ្ឋមន្ត្រីរបស់ជប៉ុនលោក Yoshihide Suga ថ្លែងថា មីស៊ីលដែលបាញ់រំលងប្រទេសជប៉ុននេះ ហោះ ចូលទៅក្នុងសមុទ្រខាងកើត។
ប្រជាជនជប៉ុនរស់នៅលើកោះ Hokkaido បានដឹងពីការបាញ់មីស៊ីលរបស់កូរ៉េខាងជើងនេះ តាមសញ្ញាប្រព័ន្ធ ដែលបង្ហាញតាមទូរសព្ទដៃ និង មើលដំណឹងផ្សព្វផ្សាយតាមទូរទស្សន៍។ នេះបើតាមទីភ្នាក់ងារព័ត៌មានរ៉យទ័រ។
ទោះយ៉ាងណា ប្រជាជនជប៉ុន នៅតែរក្សាភាពស្ងៀមស្ងាត់ហាក់មិនសូវចាប់អារម្មណ៍ខ្លាំងលើការបាញ់មីស៊ីលរំលងកន្លែងដែលពួកគេរស់នៅនោះទេ គឺនៅតែបំពេញការងាររបស់ពួកគេធម្មតា។
ប្រភពពីយោធារបស់កូរ៉េខាងត្បូងបានឲ្យដឹងថា មីស៊ីលរបស់កូរ៉េខាងជើងបាញ់នៅថ្ងៃនេះ ហោះក្នុងកម្ពស់ ៧៧០គីឡូម៉ែត្រ ប្រើពេល១៩នាទី និង ហោះបានចម្ងាយ៣៧០០គីឡូម៉ែត្រ។
សហរដ្ឋអាមេរិកបញ្ជាក់ថា ពួកគេនឹងការពារសម្ព័ន្ធមិត្តជប៉ុនមិនឲ្យមានគ្រោះថ្នាក់កើតឡើងនោះទេ។ អាមេរិកក៏បានជំរុញឲ្យចិន និង រុស្ស៊ីត្រូវធ្វើការដោយផ្ទាល់ដើម្បីទប់ស្កាត់សកម្មភាពរបស់កូរ៉េខាងជើង ដោយសារចិនជា អ្នកលក់ប្រេងឲ្យកូរ៉េខាងជើង ហើយរុស្ស៊ីជាទីតាំងពលកម្មធំសម្រាប់កូរ៉េខាងជើង។
ចំណែកនៅកូរ៉េខាងត្បូងមានការកោះប្រជុំក្រុមការងារសន្តិសុខជាតិជាបន្ទាប់ ដើម្បីសិក្សាពីហានិភ័យ ដែលអាចកើតមានឡើងចំពោះប្រទេសរបស់ខ្លួន៕