កូរ៉េខាងត្បូង និងជប៉ុន បានឈានដល់កិច្ចព្រមព្រៀងដ៏ចម្រូងចម្រាស់មួយកាលពីថ្ងៃម្សិលមិញ ដើម្បីចែករំលែកព័ត៌មានចារកម្មខាងយោធា បើទោះបីមានការតវ៉ាជំទាស់ពីក្រុមគណបក្សប្រឆាំង និងសកម្មជននៅទីក្រុងសេអ៊ូលក៏ដោយ។ នេះដោយយោងតាមទីភ្នាក់ងារព័ត៌មាន AFP ដែលបានដកស្រង់សម្ដីក្រុមមន្ត្រីជប៉ុន។
ជប៉ុនបានដាក់អាណានិគមលើឧបទ្វីបកូរ៉េចាប់ពីឆ្នាំ១៩១០ ដល់ឆ្នាំ១៩៤៥ ដោយបន្សល់ទុកនូវកេរ្តិ៍ដំណែលអាក្រក់ ដែលប៉ះពាល់ដល់ទំនាក់ទំនងរវាងជប៉ុន និងប្រទេសកូរ៉េខាងត្បូង និងខាងជើងរហូតមកដល់សព្វថ្ងៃនេះ។
កូរ៉េខាងត្បូង និងជប៉ុន ស្ទើរតែចុះហត្ថលេខាលើកិច្ចព្រមព្រៀងមួយទៅហើយកាលពីខែមិថុនាឆ្នាំ២០១២កន្លងមក ប៉ុន្តែ ក្រុងសេអ៊ូលភ្លាមៗនោះ បានដកថយទៅវិញ ដោយសារព័ត៌មានជប៉ុន បានបន្ទោសទៅលើបាតុកម្មប្រឆាំងជប៉ុន នៅក្នុងចំណោមសាធារណជនកូរ៉េខាងត្បូង។
ភាគីទាំងពីរ បានបើកការចរចាឡើងវិញកាលពីខែមុន បន្ទាប់ពីកូរ៉េខាងជើងនៅតែបន្តកម្មវិធីនុយក្លេអ៊ែរ និងគ្រាប់មីស៊ីលរបស់ខ្លួន ដែលត្រូវបានគេចាត់ទុកជាការគំរាមកំហែងដល់ប្រទេសទាំងពីរ៕