គណបក្សសង្គ្រោះជាតិ អំពាវនាវឲ្យអង្គការជាតិ និងសហគមន៍អន្តរជាតិ ជួយឃ្លាំមើលស្ថានភាពសិទ្ធិមនុស្សនៅកម្ពុជា ខណៈរដ្ឋាភិបាល បង្កើនយុទ្ធនាការប្រឆាំងទៅនឹងអ្វីដែលរដ្ឋាភិបាលចាត់ទុកជា «បដិវត្តន៍ពណ៌» និង «ឧបាយកល» មានបំណងផ្ដួលរំលំរដ្ឋាភិបាលស្របច្បាប់។
ក្នុងសេចក្តីថ្លែងការណ៍ចុះថ្ងៃទី១៤ ខែវិច្ឆិកា ឆ្នាំ២០១៧ គណបក្សសង្គ្រោះជាតិ បានបង្ហាញការភ្ញាក់ផ្អើលយ៉ាងខ្លាំងចំពោះរដ្ឋាភិបាល ដែលរៀបចំកងកម្លាំងប្រដាប់អាវុធចម្រុះ ដើម្បីឃ្លាំមើលស្ថានការណ៍ នៅតាមគ្រប់ស្នាក់ការស្រុក និងខេត្តរបស់គណបក្សសង្គ្រោះជាតិ ខណៈគណបក្សប្រឆាំងដ៏មួយនេះ ប្រឈមនឹងការរំលាយដោយអំណាចតុលាការកំពូលនៅថ្ងៃទី១៦ខែវិចិ្ឆកា។
បើតាមសេចក្តីថ្លែងការណ៍ដដែល គណបក្សសង្គ្រោះជាតិ ចាត់ទុកការរៀបចំកងកំលាំងរបស់រដ្ឋាភិបាលនេះ ថាជាចេតនាបំផិតបំភ័យ និងបំបាក់ស្មារតីមកលើប្រជាពលរដ្ឋ។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី១៣ខែវិច្ឆិកា បានបញ្ជាទៅអាជ្ញាធរពាក់ព័ន្ធឲ្យចាត់វិធានការនានា ដើម្បីទប់ស្កាត់នូវអ្វីដែលលោកហៅថា ឧបាយកលមានបំណងផ្ដួលរំលំរដ្ឋាភិបាល។
អង្គការ Global Witness និងអង្គការ Human Rights Watch កាលពីដើមខែតុលាឆ្នាំ២០១៧ បានចេញសេចក្ដីថ្លែងការណ៍ថ្កោលទោសរដ្ឋាភិបាលលោក ហ៊ុន សែន បន្ទាប់ពីមានការចាប់ខ្លួនមេដឹកនាំគណបក្សសង្គ្រោះជាតិ លោក កឹម សុខា និងការប៉ុនប៉ងរំលាយបក្សប្រឆាំងដ៏ធំមួយនេះ ព្រមទាំងការបង្ក្រាបទៅលើអង្គការសង្គមស៊ីវិល និងការបិទប្រព័ន្ធផ្សព្វផ្សាយដែលរិះគន់រដ្ឋាភិបាល។
ទោះយ៉ាងណា លោកនាយករដ្ឋមន្ត្រី ហ៊ុន សែន បានព្រមានសហគមន៍អន្តរជាតិឲ្យបញ្ឈប់ការជ្រៀតជ្រែកកិច្ចការផ្ទៃក្នុងរបស់កម្ពុជា ដោយលោកថា អ្វីដែលរដ្ឋាភិបាលធ្វើ គឺជាការអនុវត្តន៍ច្បាប់ ដើម្បីការពារសន្តិភាព៕