យ៉ាងហោចណាស់មានមនុស្ស២នាក់ បានស្លាប់ភ្លាមៗ នៅហ្នឹងកន្លែង និងមនុស្ស៨នាក់ទៀតរបួស ដែលក្នុងនោះ មានជនបរទេស២នាក់ផងដែរ នៅក្នុងករណីគ្រោះថ្នាក់ចរាចរណ៍មួយ នៅព្រឹកថ្ងៃទី១៥ខែវិច្ឆិកាឆ្នាំ២០១៧ នៅខេត្តសៀមរាប។
អធិការរងទទួលបន្ទុកសណ្តាប់ធ្នាប់ចរាចរណ៍ ស្រុកប្រាសាទបាគង លោក ប៉ោះ ចន្ថា មានប្រសាសន៍ថា ឧបទ្ទវហេតុនេះ បានកើតឡើងនៅវេលាម៉ោង៦និង១០នាទីព្រឹក ស្ថិតនៅតាមបណ្ដោយផ្លូវជាតិលេខ៦ ជិតសាលាស្រុកប្រាសាទបាគង ខេត្ដសៀមរាប ដែលលោកថា បណ្ដាលឲ្យអ្នកបើរថយន្ដទាំងពីរនាក់ស្លាប់ភ្លាមៗ និងមនុស្ស៨នាក់ទៀត របួសធ្ងន់និងស្រាល ក្នុងជនជាតិបារំាង២នាក់។
សមត្ថកិច្ច ឲ្យដឹងបន្ដទៀតថា រថយន្តក្រុងនោះ ជារបស់ក្រុមហ៊ុន វីរៈប៊ុនថាំ បានដឹកអ្នកដំណើរទាំងជនជាតិខ្មែរ និងបរទេសចំនួន៣៨នាក់ មកពីក្រុងព្រះសីហនុ ឆ្ពោះទៅខេត្ដសៀមរាប តាមបណ្ដោយផ្លូវជាតិលេខ៦ ប៉ុន្ដែដល់ជិតចំណុចខាងកើតសាលាស្រុកប្រាសាទបាគង ខេត្ដសៀមរាប បណ្ដាលឲ្យជួបគ្រោះថ្នាក់តែម្ដង ខណៈដល់ផ្លូវកោង អ្នកបើកបររថយន្ដទាំងពីរ មិនប្រកាន់ស្ដាំរៀងៗខ្លួន។
របាយការណ៍គ្រោះថ្នាក់ចរាចរណ៍ផ្លូវគោកទូទាំងប្រទេស រយៈពេល១៣ថ្ងៃ ចាប់គិតពីថ្ងៃទី០១ ដល់ថ្ងៃទី១៣ខែវិច្ឆិកាឆ្នាំ២០១៧ កើតឡើងចំនួន ១២៧លើក បណ្តាលឲ្យមនុស្សស្លាប់ចំនួន ៧៣នាក់ របួសសរុប២៣៨នាក់ ក្នុងនោះរបួសធ្ងន់ ១១៩នាក់៕