ក្រុមភ្នាក់ងារអ្នកវាយតម្លៃពីផលប៉ះពាល់បរិស្ថានៅចិន នឹងចាប់ផ្តើមភ្ជាប់ទំនាក់ទំនងជាមួយមន្ត្រីមូលដ្ឋានទាំងអស់នៅចុងឆ្នាំនេះ ដើម្បីដោះស្រាយបញ្ហាផលប៉ះពាល់ធ្ងន់ធ្ងរនិងជួយដល់ការងារក្រសួងជំរុញកុំឲ្យមានការបំពុលខ្យល់ បំពុលទឹក និងបំពុលដី។
ទីភ្នាក់ងារសារព័ត៌មានរដ្ឋចិនស៊ីនហួរចុះផ្សាយថា ក្រសួងការពារបរិស្ថាន បានប្រកាសនៅថ្ងៃព្រហស្បតិ៍នេះថា ទីភ្នាក់ងារវាយតម្លៃចំនួន៣៣៧ បានត្រៀមរៀបចំអស់ហើយក្នុងការចុះធ្វើការជាមួយមន្ត្រីមូលដ្ឋាននៅត្រឹមចុងឆ្នាំនេះ ចំណែកភ្នាក់ងារចំនួន១៣ទៀតបានចាប់ផ្តើមដំណើរការងារពួកគេហើយ។
នៅដើមសប្តាហ៍នេះ ចិនបានដាក់ទោសមន្ត្រីប្រមាណ៧០០នាក់ ពាក់ព័ន្ធការខ្វះចន្លោះក្នុងការ ការពារបរិស្ថាន។ ចំណែកមន្ត្រីប្រមាណ៣០០០នាក់ ត្រូវបានគេដាក់ផាកពិន័យជាទឹកប្រាក់បានប្រមាណ១៩៨លានយ័ន ដែលស្មើនឹងប្រមាណ២៩លានដុល្លារ ដោយសារការធ្វើឲ្យប៉ះពាល់ដល់បរិស្ថាន។
ក្រសួងបរិស្ថានរបស់ចិន បានបើកឲ្យមានការស៊ើបអង្កេតកាលពីដើមឆ្នាំនេះ ទៅលើមន្ត្រី និង សហគ្រាស ដែល ធ្វើសកម្មភាពប៉ះពាល់បរិស្ថាន។
ចិនបានព្យាយាមពង្រឹងការពារបរិស្ថាន ដើម្បីជាផ្នែកការមួយក្នុងការ ការពារការបំពុល ដោយសារមានការប៉ះពាល់ខ្លាំងកាលពីឆ្នាំ២០១៤ ដោយសារបញ្ហាបរិស្ថាន៕