ប្រធានាធិបតីជាប់ឆ្នោតអាមេរិកបានហៅទូរសព្ទទៅកាន់នាយករដ្ឋមន្ត្រីវៀតណាមថា លោកចង់ពង្រឹងចំណងទាក់ទងយ៉ាងកក់ក្តៅរវាងប្រទេសទាំងពីរឲ្យបានឆាប់រហ័ស។
វៀតណាមមានទំនាក់ទំនងស្រាប់ហើយជាមួយរដ្ឋការលោក អូបាម៉ា ក្នុងកម្រិតថ្មីមួយ ចំពេលដែលប្រទេសកុម្មុយនីស្តវៀតណាមប្រឈមមុខក្នុងជម្លោះសមុទ្រចិនជាមួយប្រទេសកុម្មុយនីស្តចិន ក្នុងដណ្តើមគ្នាកាន់កាប់សមុទ្រផ្លូវទឹកសំខាន់នៅសមុទ្រចិនខាងត្បូង។
ក្នុងកិច្ចសន្ទនាតាមទូរសព្ទកាលពីថ្ងៃពុធម្សិលមិញ នាយករដ្ឋមន្ត្រីវៀតណាមលោក ង្វៀន សួនផុក បានថ្លែងអបអរលោក ត្រាំ ចំពោះការទទួលបានជ័យជំនះក្នុងការបោះឆ្នោត ហើយបានលើកឡើងពីសារៈសំខាន់នៃការទំនាក់ទំនងរបស់ប្រទេសទាំងពីរ។ នេះបើតាមទីភ្នាក់ងារសារព័ត៌មានរ៉យទ័រ។
ចំណែកលោក ត្រាំ បានលើកឡើងពីការសម្រេចបានលទ្ធផលការងារខ្ពស់របស់ប្រទេសវៀតណាម ហើយលោកក៏បានលើកឡើងពីចំណុចល្អនៃការទាក់ទងគ្នារវាងប្រទេសទាំងពីរ។
វៀណាមនិងអាមេរិក គឺជាអតីសត្រូវធ្វើសង្គ្រាមប្រឆាំងគ្នាកាលពីឆ្នាំ១៩៥៥ដល់ឆ្នាំ១៩៧៥ ដែលកាលណោះ ពលរដ្ឋនិងទាហានវៀតណាមស្លាប់អស់ប្រមាណ១លាននាក់ ចំណែកទាហានអាមេរិកស្លាប់អស់ប្រមាណ៦ម៉ឺននាក់៕
