អង្គការសង្គមស៊ីវិលលើកឡើងថាសេរីភាព និងសកម្មភាពរបស់ខ្លួនកាន់តែត្រូវបានរដ្ឋាភិបាលរឹតត្បិតបន្ទាប់បក្សប្រឆាំងដ៏ធំជាងគេនៅកម្ពុជាត្រូវបានតុលាការកំពូលរំលាយ ហើយថា អង្គការមួយចំនួនកំពុងប្រឈមបិទទ្វារឈប់ដំណើរការ។
នាយកប្រតិបត្តិគណៈកម្មាធិការសហប្រតិបត្តិការដើម្បីកម្ពុជាលោក សឿង សារឿន បានលើកឡើងក្នុងកិច្ចប្រជុំពីការលើកកំពស់អភិបាលកិច្ចល្អ និងនិរន្តរភាពរបស់អង្គការសង្គមស៊ីវិលនៅថ្ងៃសុក្រនេះ ថាស្ថានការណ៍នយោបាយកម្ពុជាបច្ចុប្បន្នកំពុងតែបង្កការលំបាកដល់សេរីភាព និងសកម្មភាពរបស់អង្គការសង្គមស៊ីវិលកាន់តែខ្លាំង ។
លោកបានបញ្ជាក់បន្ថែមប្រាប់វីអូឌីថា៖ «មួយរយៈកាលកន្លងមកគឺមានការចោទប្រកាន់ថា ប្រទេសដែលផ្តល់ជំនួយមកដូចជាសហរដ្ឋអាមេរិក ឬមួយក៏សហភាពអឺរ៉ុប ដែលថាបានគាំទ្រឲ្យមានដំណើរការបដិវត្តន៍ព័ណ៌ ហើយដែលសង្គមស៊ីវិលយើងគិតថាមិនមានបដិវត្តន៍ព័ណ៌នៅស្រុកខ្មែរហ្នឹងអញ្ចឹង យើងឃើញថាម្ចាស់ជំនួយមួយចំនួនគឺគាត់ពិបាកក្នុងការផ្តល់លុយមកសង្គមស៊ីវិល ហើយសង្គមស៊ីវិលក៏ពិបាកទទួលជំនួយ។ … នៅពេលដែលយើងចុះធ្វើសកម្មភាពផ្ទាល់ជាមួយប្រជាពលរដ្ឋ ហើយយើងក៏ពិបាកក្នុងការប្រមែប្រមូលប្រជាពលរដ្ឋដែរ ដោយសារប្រជាពលរដ្ឋមួយចំនួនធំហ្នឹង ត្រូវបានឃ្លាំមើលពីអាជ្ញាធរមូលដ្ឋានជាពិសេសពេលដែលយើងមានពិធីធំៗហ្នឹងគឺមានបញ្ហាប្រឈម»។
ប្រធានគ្រប់គ្រងនៃអង្គការជំនួយផ្នែកច្បាប់នៅកម្ពុជាលោក កៅ ឌីណា មានប្រសាសន៍ថា អង្គការសង្គមស៊ីវិលមួយចំនួនប្រឈមទៅនឹងការបិទទ្វារ លែងទទូលបានជំនួយ ឬម្ចាស់ជំនួយពន្យារពេល ដោយសារភាពរកាំរកូសផ្នែកការទូតរវាងកម្ពុជា ជាមួយប្រទេសម្ចាស់ជំនួយទាំងនោះ លើសពីនេះទៀតការរឹតបន្តឹងផ្នែកច្បាប់ពីសំណាក់រដ្ឋាភិបាល និងការបង់ពន្ធក៏ជាការធ្វើឲ្យអង្គការទាំងនោះកាន់តែលំបាកក្នុងការអនុវត្តន៍ការងាររបស់ខ្លួនកាន់តែខ្លាំងថែមទៀត។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គឹមអេង មានប្រសាសន៍ថា អង្គការសង្គមស៊ីវិលបច្ចុប្បន្ននេះកំពុងស្ថិតក្នុងចន្លោះនៃវិបត្តិស្ថានការណ៍ និងការលើកកម្ពស់សេរីភាព និងការចូលរួមរបស់ប្រជាជនជន។
លោកថា៖ «ហេតុអីបានខ្ញុំហ៊ានថាអញ្ចឹង! ព្រោះថាអ្នកដែលចង់ទៅមុនក៏មិនហ៊ាន ដកថយក្រោយក៏មិនហ៊ានគឺនៅត្រឹងតែនៅហ្នឹង។ រឿងដែលសំខាន់មួយទៀតដែលខ្ញុំឃើញសូម្បីតែគេលាបព័ណ៌សង្គមស៊ីវិលថាពួកបដិវត្តន៍ព័ណ៌ពួកអីអញ្ចឹងទៅ សូម្បីតែបកស្រាយ និយាយអីឲ្យនេះទេ សូម្បីតែបកស្រាយដើម្បីការពារខ្លួនឯងហ្នឹងណា ពេលខ្លះអ្នកខ្លះក៏មិនហ៊ានបកស្រាយទៅទៀត ព្រោះបារម្ភណាស់។ អញ្ចឹងបានន័យថាយើងមានការបារម្ភច្រើនណាស់ដែរ ហ្នឹងជាទូទៅទាំងអស់គ្នាហ្នឹងមានការបារម្ភច្រើនដែរ»។
អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថាលោកសោកស្តាយចំពោះការលើកឡើងរបស់អង្កការសង្គមស៊ីវិលទាំងនេះ និងថាការលើកឡើងនេះជាការលើកឡើងដដែលៗ ដោយមើលមិនឃើញពីការយកចិត្តទុកដាក់ពីរដ្ឋាភិបាល។
លោកថា៖ «ពូមិនដែលឮថ្ងៃណាគាត់ថារីកចម្រើនផង ជាការគួរឲ្យស្តាយគ្រាន់តែថាឥឡូវបើយើងអត់មានពាក់ព័ន្ធអី ធ្វើធម្មតាទៅមានអ្នកណាទៅធ្វើអីបដិវត្តន៍ព័ណ៌អីឯណា យើងកុំតែទៅធ្វើទៅ។ ដូនតាយើងបង្រៀនប្រាប់មេឃុំម៉ាម៉ាត់ទៅ ថាពូអើយខ្ញុំធ្វើអានេះមួយខ្ញុំអង្គការមានច្បាប់ហើយមកប្រជុំប្រជាជនមួយរឿងនេះ ប្រាប់គេមួយម៉ាត់ទៅគេកាប់ដូងឲ្យផឹកទៀតនោះ វ៉ៃមាន់ឲ្យស៊ីទៀត។ បើយើងទៅអង្គការមកប្រជុំប្រជាជនក៏អញដល់ធ្វើអញ្ចឹងដូចមិនកើតទេ»។
ទំនាក់ទំនងកម្ពុជា និងលោកសេរី ហាក់កាន់តែតានតឹងឡើង បន្ទាប់ពីរដ្ឋាភិបាលកម្ពុជា បានចាប់ឃុំប្រធានអតីតបក្សសង្គ្រោះជាតិ និងបានរំលាយបក្សនេះកាលពីពាក់កណ្តាលខែមុន ដោយ ថាមានបំណងចង់ធ្វើបដិវត្តន៍ព័ណ៌ ដើម្បីផ្ដួលរំលំរដ្ឋាភិបាលស្របច្បាប់ ដែលមានអាមេរិកនៅពីក្រោយ៕