ក្រុមហ៊ុនផលិតគ្រឿងអេឡិចត្រូនិច Samsung ជាក្រុមហ៊ុនធំមួយលើពិភពលោករបស់កូរ៉េខាងត្បូងបានបញ្ជាក់ថា ពួកគេរកឃើញមូលហេតុដែលបណ្តាលឲ្យផ្ទុះថ្មទូរសព្ទប្រភេទ Samsung Galaxy Note 7 ហើយលទ្ធផលនឹងប្រកាសជាផ្លូវការនៅថ្ងៃទី២៣ខែមករា។
ទីភ្នាក់ងារសារព័ត៌មានរ៉យទ័របញ្ជាក់ថា នេះបើតាមការអះអាងរបស់បុគ្គលិកម្នាក់ដែលធ្វើការនៅក្នុងក្រុមហ៊ុន Samsung។ ក្រុមហ៊ុនបានបញ្ជាក់ថា ពួកគេរកឃើញមូលហេតុនេះ ហើយការផលិតលើកក្រោយជៀសវាងកើតមានបញ្ហាដដែលបន្តទៀត។ ទោះយ៉ាងណា អ្នកនាំពាក្យក្រុមហ៊ុន Samsung មិនទាន់អត្ថាធិប្បាយលម្អិតលើបញ្ហានេះទេ។
បន្ទាប់ពីរកឃើញមូលហេតុបរាជ័យក្នុងការផលិតកន្លងទៅនោះ ក្រុមហ៊ុនគ្រោងបង្ហាញផលិតផលប្រភេទថ្មី សម្រាប់ឆ្នាំ២០១៧ Galaxy S8 នៅពាក់កណ្តាលឆ្នាំនេះ។
កាលពីចុងឆ្នាំ២០១៦កន្លងទៅ ក្រុមហ៊ុន Samsung បានប្រកាសប្រមូលទូរសព្ទ Samsung Galaxy Note 7 ពីអតិថិជនទូទាំងពិភពលោក បន្ទាប់ពីការចែកចាយហើយមានព័ត៌មានត្រឡប់ថា ទូរសព្ទផ្ទុះឆេះពេលសាកថ្ម ដែលអាចបង្កគ្រោះថ្នាក់ដល់អ្នកប្រើប្រាស់៕
