មន្ត្រីក្រសួងសាធារណការ បានឲ្យដឹងថា សមត្ថកិច្ចបានរកឃើញរថយន្តធុនធំដឹកលើសទម្ងន់ជិត ៣ពាន់គ្រឿង នៅក្នុងប្រតិបត្តិការត្រួតពិនិត្យរថយន្តធុនធំពេញមួយឆ្នាំកន្លងមកនេះ។
អ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ឹមសុរិយា បានប្រាប់VODនៅថ្ងៃនេះថា ក្រសួងរបស់លោក បានត្រួតពិនិត្យរថយន្តធុនធំដល់ទៅ ៩២៣,៦៥៨គ្រឿងកាលពីឆ្នាំ២០១៧ ហើយផាកពិន័យរថយន្តផ្ទុកលើសទម្ងន់ ២,៩៥៣គ្រឿង ដោយប្រមូលបានថវិកាជាង ៥ពាន់ ៧៧៨លានរៀល ខណៈដែលរថយន្តកែច្នៃខុសលក្ខណៈបច្ចេកទេស លោកថា សមត្ថកិច្ចកាត់ទ្រុងចោលចំនួន ១,២១៥គ្រឿង។
ករណីនេះ អ្នកនាំពាក្យរូបនោះ បានអំពាវនាវទៅអ្នកបើកបររថយន្តដឹកជញ្ជូនទំាងអស់ ត្រូវគោរពច្បាប់ និងឈប់កែច្នៃរថយន្តទ្រុងខុសបច្ចេកទេស ដើម្បីកាត់បន្ថយគ្រោះថ្នាក់ចរាចរណ៍ ខណៈតួលេខអ្នកស្លាប់កើនឡើងជារៀងរាល់ឆ្នាំ។
របាយការណ៍នគរបាលចរាចរណ៍ បានឲ្យដឹងថា មនុស្សដល់ទៅ ១,៧៨០នាក់ បានស្លាប់ ហើយជាង ៥៥០០នាក់ទៀត បានរងរបួសនៅក្នុងគ្រោះថ្នាក់ចរាចរណ៍នៅទូទាំងប្រទេសកាលពីឆ្នាំមុន៕
