អ្នកឃ្លាំមើលពីការអភិវឌ្ឍសង្គមនិងនយោបាយ លោក គឹម សុខ ដែលរិះគន់រដ្ឋាភិបាលឥតសម្ចៃមាត់នោះ បានដាក់ពាក្យសុំពន្យាពេលចូលបំភ្លឺនៅតុលាការ ដើម្បីតតាំងក្តីនឹងលោក ហ៊ុន សែន ដោយថា ខ្លួនមិនទាន់រកមេធាវីការពារបាន។
សាលាដំបូងរាជធានីភ្នំពេញ បានបង្គាប់ឲ្យលោក គឹម សុខ ចូលបំភ្លឺនៅថ្ងៃសុក្រស្អែក ។
លោក ហ៊ុន សែន បានប្តឹងអ្នកវិភាគរូបនេះ ពីពីបទបរិហារកេរ្តិ៍ជាសាធារណៈនិងញុះញង់ឲ្យ មានភាពវិកវរធ្ងន់ធ្ងរដល់សន្តិសុខសង្គម ដែលប្រឈមជាប់ទោសពីរឆ្នាំ ហើយទារជំងឺចិត្ត៥០ម៉ឺនដុល្លារ។ បណ្តឹងនេះធ្វើឡើងបន្ទាប់ពីលោក គឹម សុខ ថ្លែងថាករណីបាញ់សម្លាប់ លោក កែម ឡី អាចជាប់ពាក់ព័ន្ធបក្សកាន់អំណាច។
ក្រោយដាក់ពាក្យសុំពន្យារពេលចូលបំភ្លឺ លោក គឹម សុខ ថ្លែងនៅព្រឹកនេះថា សំណុំរឿងរបស់លោកពិបាកពឹងពាក់មេធាវី ដោយសារតែជាបណ្តឹងរបស់លោក ហ៊ុន សែន ប្រឆាំងនឹងរូបលោកផង ហើយមួយវិញទៀត លោក ក៏អត់មានលុយជួលមេធាវីនោះទេ។
លោកថា៖ «គឺមិនហ៊ានទទួលហ្នឹងមែនហើយ ពិចារណា បារម្ភ អំពីរឿងក្តី របស់ខ្ញុំហ្នឹងវាចំពេក សម្តេចនាយករដ្ឋមន្ត្រីគាត់បញ្ជាឲ្យប្តឹងៗតែម្តង។ ពលរដ្ឋសាមញ្ញធម្មតាខ្ញុំអត់មានតួនាទីស្អីសោះ»។
ទោះជាយ៉ាងណា អ្នកនាំពាក្យសាលាដំបូងរាជធានីភ្នំពេញ លោក លី សុផាណា ប្រាប់ក្រុមអ្នកសារព័ត៌មានតាមប្រព័ន្ធតេលេក្រាមថា តំណាងអាយ្យការនឹងមិនពន្យារពេលតាមការស្នើសុំរបស់លោក គឹម សុខ ទ្បើយ។
លោក គី តិច ជាមេធាវីការពារក្តីឲ្យលោកនាយករដ្ឋមន្ត្រី ហ៊ុន សែន អះអាងថា នៅថ្ងៃព្រហស្បតិ៍នេះលោកបានទទួលសិទ្ធិ ឲ្យប្តឹងលោក គឹម សុខ មួយករណីបន្ថែមទៀត។ តែលោកសុំមិនបញ្ជាក់ថា តើពាក្យបណ្តឹងនោះ នឹងប្តឹងពីបទអ្វី និងទារសំណងប៉ុន្មានពិតប្រាកដទេ ដោយថារងចំាដាក់ពាក្យបណ្តឹងរួចរាល់នៅតុលាការសិន។
ប៉ុន្តែបើតាមគេហទំព័រ Fresh News ដែលស្គាល់ថាស្និទនឹងរដ្ឋាភិបាលនោះបានចុះផ្សាយថា លោក គឺ តិច ដែលតំណាងឲ្យលោក ហ៊ុន សែន នោះបាននិយាយថា «បានដាក់ពាក្យបណ្តឹងប្តឹងលោក គឹម សុខ មួយករណីទៀត បន្ទាប់លោក គឹម សុខ បានចោទប្រកាន់មកលើរាជរដ្ឋាភិបាលថា រដ្ឋាភិបាលបច្ចុប្បន្នបានបង្កើតមានប្រព័ន្ធមួយ ដែលមានការសម្លាប់មនុស្សហើយរកមុខឃាតកមិនឃើញ»។
លោក គឹម សុខ ឲ្យដឹងដែរថា បើទោះបីលោក ហ៊ុន សែន បន្តប្តឹងលោកបន្ថែមទៀតក៏ដោយ តែលោកថា លោក នូវតែអត្ថាធិប្បាយឆ្លុះបញ្ចាំងការពិតដែលកើតមានក្នុងសង្គម។
លោកថា៖ «ខ្ញុំមិនដូរជំហររឿងអត្ថាធិប្បាយអំពីសង្គមនិងនយោបាយទេ ទី១។ ទី២ មិនរត់ទៅណាទេ កុំថាឡើយដាក់មួយបន្ថែមទៀត ដាក់១០០ថែមទៀត ក៏ខ្ញុំមិនរត់ទៅណាដែរ ជម្រាបជំហរច្បាស់លាស់អំពីរឿងហ្នឹង»។
អ្នកនាំពាក្យសមាគមអាដហុក លោក សំ ចាន់គា លើកឡើងថា ចំណាត់ការបន្តបន្ទាប់ទៅលើមន្រ្តីសង្គមស៊ីវិល និងអ្នកវិភាគកន្លងនេះ លោកថាជាការប្រើប្រព័ន្ធច្បាប់គំរាមកំហែងដល់សំឡេងអ្នករិះគន់។
លោកថា៖ «ខ្ញុំយល់ថាជាយន្តការរបស់រាជរដ្ឋាភិបាលក្នុងការក្នុងការបំភិតបំភ័យដល់សកម្មជនសិទ្ធិមនុស្ស កុំឲ្យហ៊ានងើបតវ៉ា កុំឲ្យហ៊ានបញ្ចេញមតិរិះគន់អ្វីដែលរដ្ឋាភិបាលធ្វើខ្វះខាត»។
ទោះជាយ៉ាងណាកាលពីសប្តាហ៍មុន លោក ហ៊ុន សែន ថ្លែងជាសាធារណៈការពារថា រដ្ឋាភិបាលមិនជាប់ពាក់ព័ន្ធទៅនឹងការបាញ់សម្លាប់ កែម ឡី នោះទេ ដោយដាក់ជាសំនួរថា «ឃាតកម្មមួយកើតឡើង ក្រោមការដឹកនាំ របស់លោក ប្រជាប្រិយភាពវានឹងបានទៅលើនរណា?»។
ប៉ុន្តែមហាជននៅតែដាក់កាសង្ស័យថា បើរដ្ឋាភិបាលមិនជាប់ពាក់ព័ន្ធនឹងការបាញ់សម្លាប់លោក កែម ឡី នោះ ហេតុអ្វីបានជាងកន្លះឆ្នាំមកនេះ រដ្ឋាភិបាលមិនអាចវែកមុខអ្នកនៅពីក្រោយឃាតកម្មនេះ មកផ្តន្ទាទោសបាន ក្រៅពីជនសង្ស័យម្នាក់ ឈ្មោះជួប សម្លាប់ ដែលសមត្ថកិច្ចចាប់បានក្រោយកើតហេតុនោះ៕
