ក្រសួងពន្យល់ថា បាតុភូតចុះអ័ព្ទខ្លាំងនៅក្នុងរាជធានីភ្នំពេញថ្ងៃនេះ កើតឡើងដោយសារខ្យល់ពីរក្រុមប៉ះគ្នា ហើយមិនមានផលប៉ះពាល់អ្វីធ្ងន់ធ្ងរនោះទេ។
អ្នកនាំពាក្យក្រសួងធនធានទឹក និងឧត្តុនិយម លោក ចាន់ យុត្ថា ពន្យល់ថា ការចុះអ័ព្ទនេះកើតឡើងមកពីការជួបប្រសព្វគ្នារវាងម៉ាសខ្យល់ត្រជាក់ និងខ្យល់ក្តៅ ដោយសារឥទ្ធិពលនៃខ្យស់មូសុងឦសាន្តស្ងួតត្រជាក់ជួបជាមួយខ្យល់មកពីសមុទ្រជាខ្យល់ក្តៅ ដែលជាឥទ្ធិពលរបស់ព្យុះសាន់បា។
លោកបន្តថាបន្ទាប់ពីបាតុភូតនេះ នៅពេលថ្ងៃរសៀលឬយប់នេះនឹងអាចមានភ្លៀងធ្លាក់រាយប៉ាយបន្តទៀត។
លោកបញ្ជាក់ថា អ័ព្ទរបៀបនេះមិនបង្កជាបញ្ហាអ្វីទេ គ្រាន់តែមើលទៅរាងអាប់អួរធ្វើឲ្យហប់ និងមានសភាពស្អុះស្អាប់នៅពេលថ្ងៃ ដែលជាបាតុភាពប្រទាញប្រទុងគ្នាមុនភ្លៀង។
លោបឲ្យដឹងដែរថា កម្ពុជាកំពុងទទួលរងឥទ្ធិពលព្យុះទី២ឈ្មោះសាន់បា ធ្វើដំណើរឆ្លងពីហ្វីលីពីនមកសមុទ្រចិនខាងត្បូង ហើយកំពុងតែបន្តដំណើរមកភាគអាគ្នេយ៍ប្រទេសវៀតណាម។ យប់នេះព្យុះនឹងធ្វើដំណើរមកគៀកតំបន់ធ្នេរប្រទេសវៀតណាម ធ្វើឲ្យកម្ពុជាអាចនឹងមានភ្លៀងធ្លាក់នៅតំបន់មាត់សមុទ្រ បណ្តាខេត្តមួយចំនួននៅតំបន់ខ្ពង់រាប និងខេត្តភាគខាងកើតជាប់ប្រទេសវៀតណាមរួមទាំងភ្នំពេញដែរ៕
