រដ្ឋាភិបាលកម្ពុជា បានសន្យាបង្កើនកិច្ចគាំពារដល់ប្រជាពលរដ្ឋវៀតណាម ដែលកំពុងរស់នៅក្នុងប្រទេសកម្ពុជា តបតាមការស្នើសុំរបស់ភាគីវៀតណាម។
សេចក្តីប្រកាសរួមចុះថ្ងៃទី១៥មីនា បន្ទាប់ពីកិច្ចប្រជុំលើកទី៩ «ស្តីពីកិច្ចសហប្រតិបត្តិការ និងការអភិវឌ្ឍរវាងបណ្តាខេត្តជាប់ព្រំដែនកម្ពុជា-វៀតណាម» ឲ្យដឹងថា «ក្នុងស្មារតីមិត្តភាពរវាងប្រទេសទាំងពីរ ភាគីកម្ពុជានឹងបន្តចាត់វិធានការសមស្របនានា ក្នុងការធានាសិទ្ធិស្របច្បាប់របស់អាណិកជនវៀតណាម ដែលត្រូវបានប្រព្រឹត្តិដោយស្មើភាព ដូចជនបរទេសដទៃទៀតរស់នៅកម្ពុជា ដោយស្របតាមច្បាប់និងលិខិតបទដ្ឋានរបស់ប្រទេសកម្ពុជា»។
នៅក្នុងជំនួបជាមួយប្រធានរដ្ឋសភាលោក ហេង សំរិន នៅថ្ងៃម្សិលមិញនេះដែរ លោក ផាម ប៊ិញមិញ រដ្ឋមន្ត្រីក្រសួងការបរទេសវៀតណាម ក៏បានស្នើឲ្យជួយបង្កលក្ខណៈងាយស្រួល ដល់បណ្ដាក្រុមហ៊ុនវៀតណាម និងជួយការពារអ្នកវិនិយោគទុន ដែលមកបណ្ដាក់ទុននៅកម្ពុជា ពិសេសលើបញ្ហាផ្នែកច្បាប់។
ពាក់ព័ន្ធករណីនេះ មន្ដ្រីនាយកដ្ឋានអន្តោប្រវេសន៍ធ្លាប់ឲ្យដឹងថា ជនបរទេសរស់នៅកម្ពុជាមានប្រមាណជាង១៦ម៉ឺននាក់ ក្នុងនោះជនជាតិវៀតណាមមានច្រើនជាងគេ គឺមានជាង៩៩ភាគរយ ហើយជនជាតិវៀតណាម មានប្រមាណជាង៧ម៉ឺននាក់ ដែលបានកាន់កាប់ឯកសារខុសប្រក្រតី។
ក្រៅពីនេះ សេចក្ដីប្រកាសព័ត៌មានដដែល ឲ្យដឹងទៀតថា ភាគីវៀតណាមបានថ្លែងអំណរគុណដល់រដ្ឋាភិបាលកម្ពុជា ដែលបានអនុញ្ញាតឲ្យខ្លួននាំចូលផលិតផលមកកម្ពុជាដូចជា ប្រេងឥន្ធនៈ ដែក ជី វាយនភ័ណ្ឌ គ្រឿងម៉ាស៊ីន និងផលិតផលធ្វើអំពីជ័រជាដើម។ ចំណែក កម្ពុជា ក៏បាននាំចេញផលិតផលមួយចំនួនទៅវៀតណាមដូចគ្នា ដូចជា កៅស៊ូ គ្រាប់ស្វាយចន្ទី ឈើ និងពោត។
គិតត្រឹមខែកុម្ភៈឆ្នាំ២០១៧ ទំហំពាណិជ្ជកម្មកម្ពុជា-វៀតណាម សម្រេចបានប្រមាណ ៦២៤,១លានដុល្លារអាមេរិក កើនឡើង ២១,២ភាគរយ បើធៀបនឹងឆ្នាំ២០១៦។ ក្នុងនោះ ថវិកានាំចេញរបស់វៀតណាមមកកម្ពុជា មានប្រមាណ ៣៨៨លានដុល្លារអាមេរិក កើនឡើង១៩ភាគរយ។ ចំណែក ទំហំថវិការបស់កម្ពុជាទៅវៀតណាម សម្រេចបានប្រមាណ២៣៦,១លានដុល្លារអាមេរិក កើនឡើង២៥ភាគរយ បើធៀបនឹងរយៈពេលដូចគ្នាឆ្នាំ២០១៦៕