នៅព្រឹកថ្ងៃសុក្រនេះ អគ្គិភ័យបានឆាបឆេះសាលមហោស្រពអង្គរ ដែលមានទីតាំងនៅទល់មុខរោងកុនបារាយអណ្ដែត ស្ថិតក្នុងសង្កាត់គោកចក ក្រុង-ខេត្តសៀមរាប តាមផ្លូវទៅប្រាសាទអង្គរវត្ត។
ស្នងការនគរបាលខេត្តសៀមរាប លោក ទិត្យ ណារ៉ុង ឲ្យ VOD ដឹងថា អាជ្ញាធរ និងឡានពន្លត់អគ្គិភ័យ ត្រូវបានបញ្ជូនទៅអន្ដរាគមន៍ ហើយអគ្គិភ័យនៅតែបន្ដឆាបឆេះ រហូតមកទល់ម៉ោងនេះ។
សមត្ថកិច្ចនៅកន្លែងកើតហេតុប្រាប់ថា អគ្គិភ័យបានឆាបឆេះសាលមហោស្រពនេះអស់ប្រមាណ៦០ភាគរយ និងថា មូលហេតុសង្ស័យមកពីបញ្ហាផ្ទុះចរន្ដភ្លើង។
កាលពីយប់មិញនិងបន្តរហូតដល់ព្រឹកនេះ អគ្គិភ័យមួយ ក៏បានឆាបឆេះផ្សារច្បារអំពៅ ក្នុងរាជាធានីភ្នំពេញផងដែរ និងបានខូចខាតទ្រព្យសម្បត្តិជាច្រើន៕
