មេដឹកនាំសិង្ហបុរី បានថ្លែងថា តុល្យាភាពយុទ្ធសាស្ត្រសកលលោក បានផ្លាស់ប្ដូរជាមួយនឹងកំណើននៃឥទ្ធិពល និងផលប្រយោជន៍ចិននៅក្នុងតំបន់ ហើយនាំទៅរកការឆ្លើយតបផ្សេងៗនៅក្នុងចំណោមប្រទេសជាសមាជិកអាស៊ាន។ នេះបើតាមការចុះផ្សាយរបស់សារព័ត៌មាន Channel News Asia។
សារព័ត៌មានមួយនេះ បានចុះផ្សាយថា លោកនាយករដ្ឋមន្ត្រី លី សៀនឡុង បានថ្លែងបែបនេះនៅក្នុងសន្និសីទរួមទ្វេភាគីជាមួយនាយករដ្ឋមន្ត្រីអូស្ត្រាលី លោក Malcom Turnbull អំឡុងកិច្ចប្រជុំកំពូលពិសេសអាស៊ាន-អូស្ត្រាលី នៅក្នុងទីក្រុងស៊ីដនី នៅថ្ងៃនេះ។
លោក លី បានកត់សម្គាល់ថា អាស៊ានមិនបានមើលឃើញពិភពលោកក្នុងផ្លូវខ្មៅងងឹត ឬសនោះឡើយ ហើយធ្វើទំនាក់ទំនងពាណិជ្ជកម្មជាមួយមហាអំណាចធំៗទាំងអស់នៅលើពិភពលោក។
មេដឹកនាំសិង្ហបុរីរូបនេះ បានបន្ថែមថា បណ្ដាប្រទេសនានាសុទ្ធតែមានផលប្រយោជន៍របស់ពួកគេ និងមើលឃើញពិភពលោកក្នុងផ្លូវផ្សេងៗគ្នា៕