លោកនាយករដ្ឋមន្ត្រី ហ៊ុន សែន អះអាងថា លោកកំពុងឲ្យស៊ើបអង្កេតការបាញ់សម្លាប់លោក កែម ឡី ដោយលោកដាក់ការសង្ស័យថាឃាតកម្មនេះបង្កឡើងដោយចារកម្មរបស់អាមេរិក។
លោក ហ៊ុន សែន ក្នុងពិធីជួបសំណេះសំណាលជាមួយពលរដ្ឋខ្មែរ នៅប្រទេសអូស្ត្រាលីនាថ្ងៃនេះ ថ្លែងថា លោកសោកស្តាយ ដែលប្រពន្ធលោក កែម ឡី លោកស្រី ប៊ូ រចនា សម្រេចចិត្តចូលរួមធ្វើបាតុកម្មនៅប្រទេសអូស្តា្រលីប្រឆាំងនឹងវត្តមានរូបលោក ដោយថា លោកជាអ្នកនៅពីក្រោយការបាញ់សម្លាប់ប្តីអ្នកស្រី។
លោក ហ៊ុន សែន បន្តថា តាមការឲ្យដឹងពីភ្នាក់ងារចារកម្ម អ្នកដែលបាញ់សម្លាប់ លោក កែម ឡី ជាចារកម្មអាមេរិក។ លោកថាលោកកំពុងឲ្យគេស៊ើបអង្កេតករណីនេះ ។
លោក ហ៊ុន សែន បង្ហើបថា អនុប្រធានវិទ្យុអាស៊ីសេរី លោក ជុន ចាន់បុត្រ ធ្លាប់និយាយរឿងនេះ ពេលអនុប្រធានវិទ្យុរូបនេះ ទៅជួបមេបញ្ជាការកងទ័ព និងកូនប្រុសលោក សុំជួយការពារសុវត្ថិភាព ដោយថាខ្លាចអាមេរិកសម្លាប់ដូច លោក កែម ឡី។
លោកថា៖ «ជុន ចាន់បុត្រ បានទៅជួបឧត្តមសេនីយឯក ម៉ៅ សុផាន់ មេបញ្ជាការកងពលតូច៧០ មុន ជុន ចាន់បុត្រ ជួប ហ៊ុន ម៉ាណែត កូនប្រុសរបស់ខ្ញុំ។ តើ ជុន ចាន់បុត្រ និយាយថាម៉េចទេ គាត់សុំឲ្យឧត្តមសេនីយឯក ម៉ៅ សុផាន់ ជួយការពារផង ប្រយ័ត្នពួកអាមេរិកសម្លាប់ដូច កែម ឡី»។
លោក ហ៊ុន សែន អះអាងថា លោកគាំទ្រការវិភាគរបស់លោក កែម ឡី ដោយលោកថាលោក កែម ឡី មិនមែនប្រឆាំងនឹងរដ្ឋាភិបាល។ លោកថា លោក កែម ឡី គ្រោងជួបលោកនៅថ្ងៃទី១៨ និង១៩ខែកក្កដាឆ្នាំ២០១៦ ប៉ុន្តែថា ជាអកុសលលោក កែម ឡី ត្រូវគេបាញ់សម្លាប់នៅថ្ងៃទី១០ខែកក្កដា។
VOD មិនទាន់សុំការឆ្លើយតបពី លោក ជុន ចាន់បុត្រ និងពីស្ថានទូតអាមេរិកប្រចាំកម្ពុជាបាននៅឡើយ។
លោក កែម ឡី ត្រូវបានខ្មាន់កាំភ្លើងបាញ់សម្លាប់នៅកណ្តាលរាជធានីភ្នំពេញកាលពីខែកក្កដាឆ្នាំ២០១៦ ហើយមានតែមនុស្សម្នាក់ប៉ុណ្នោះគឺ ជួប សំលាប់ ត្រូវបានតុលាការផ្តន្ទាទោសដាក់ពន្ធនាគារអស់មួយជីវិត៕