មន្ត្រីកូរ៉េខាងត្បូងនិងអ្នកជំនាញអន្តរជាតិ បានលើកឡើងថាកូរ៉េខាងជើងអាចនឹងបាញ់សាកល្បងអាវុធនុយក្លេអ៊ែលើកទី៥របស់ខ្លួននៅប៉ុន្មានសប្តាហ៍ខាងមុខនេះ បន្ទាប់ពីការ បរាជ័យក្នុងការបាញ់អាវុធមីស៊ីលកាលពីថ្ងៃសុក្រម្សិលមិញ។
អ្នកជំនាញការអន្តរជាតិនិងមន្ត្រីកូរ៉េខាងត្បូងលើកឡើងថា គណបក្សពលកររបស់កូរ៉េខាងជើងនឹងរៀបចំធ្វើសមាជ នៅដើមខែឧសភាខាងមុខនេះ។ ក្នុងពេលសមាជ គឺកូរ៉េខាងជើងនឹងជជែកពីអំណាចនៃការរីកចម្រើនអាវុធរបស់ពួកគេ។ នេះបើតាមសារព័ត៌មានChannel News Asia។
មន្ត្រីដែលទទួលបន្ទុកកិច្ចការសុវត្ថិភាពជាតិរបស់កូរ៉េខាងត្បូងថ្លែងថាកូរ៉េខាងជើងអាចនឹងបាញ់អាវុធនុយក្លែអ៊ែគ្រប់ពេលតាមបញ្ជារបស់លោក គីម ជុងអ៊ុន។ មន្ត្រីកូរ៉េខាងត្បូងរូបនេះបញ្ជាក់ថាគម្រោងបាញ់អាវុធនុយក្លែអ៊ែជាថ្មីគឺការបង្កភាពតានតឹងក្នុងតំបន់បន្ថែមទៀត។
មន្ត្រីសហរដ្ឋអាមេរិកនិងកូរ៉េខាងត្បូងបានថ្លែងថាកូរ៉េខាងជើងបានបាញ់សាកល្បងមីស៊ីលឆ្លងទ្វីបហើយបានបរាជ័យកាលពីថ្ងៃម្សិលមិញ។ កាលពីថ្ងៃសុក្រម្សិលមិញគឺជាថ្ងៃកំណើតរបស់លោក គីម អ៊ីលស៊ុង ជាស្ថាបនិកបង្កើតកូរ៉េខាងជើងហើយក៏ត្រូវជាជីតារបស់លោក គីម ជុងអ៊ុនមេដឹកនាំកូរ៉េខាងជើងបច្ចុប្បន្ន៕