មន្ត្រី​អាដហុកដែលរងការចោទប្រកាន់ស្នើឲ្យចៅក្រមហៅអ្នកពាក់ព័ន្ធសួរតទល់មុខគ្នា

លោកស្រី លឹម មុនី ត្រូវបានសាលាដំបូងរាជធានីភ្នំពេញ កោះហៅមកសាកសួរជាថ្មីទៀត

មន្ត្រីអាដហុកម្នាក់ដែលកំពុងជាប់ឃុំពីបទសូកប៉ាន់សាក្សី បានស្នើទៅចៅក្រមស៊ើបសួរឲ្យហៅនាង ខុម ចាន់រ៉ាទី និងសាក្សីមួយចំនួនទៀតមកសួរតទល់មុខគ្នាដោយថា ដើម្បីបញ្ជាក់ពីការពិតនូវអ្វីដែលភាគីនីមួយៗបានលើកឡើង។

នៅព្រឹកថ្ងៃព្រហស្បតិ៍ ទី១៦ ខែមិថុនានេះ លោកស្រី លឹម មុនី មន្ត្រីរបស់សមាគមអាដហុកត្រូវបានចៅក្រមស៊ើបសួរសាលាដំបូងរាជធានីភ្នំពេញលោក ធាម ច័ន្ទពិសិដ្ឋ បានកោះហៅមកសាកសួរជាថ្មីពីបទចោទសូកប៉ាន់សាក្សី។

ក្រោយពីសាកសួរអស់រយៈពេលប្រមាណជា៤ម៉ោង មេធាវីការពារក្តីលោកស្រី លឹម មុនី គឺលោក ហួត ជុនឌី ប្រាប់អ្នកសារព័តមានថាក្នុងអំឡុងពេលសាកសួរនោះលោកស្រី លឹម មុនី បានស្នើទៅចៅក្រមស៊ើបសួរឲ្យធ្វើការសាកសួររួមគ្នារវាងរូបគាត់និងនាង ខុម ចាន់តារ៉ាទី ហៅស្រីមុំ រួមនិងសាក្សីមួយចំនួនទៀត។ លោកបន្តថា ធ្វើដូច្នេះ ដើម្បីបង្កឱកាសឲ្យភាគីទាំងអស់បានដេញដោលគ្នាពីអ្វីដែលអ្នកទាំងនោះបានលើកឡើង។

លោកបន្ថែមថា៖ វាមានប្រយោជន៍ដែរក្នុងការអាចឲ្យភាគីទាំងអស់ចោទសួរទៅលើចំណុចមួយចំនួនដែលខ្លួនគិតថាមិនគួរនឹងសាក្សីហ្នឹងឆ្លើយអ៊ីចឹង ឧទាហរណ៍ថាចោទថាយើងអ្នកផ្តល់គំនិតសាក្សីឲ្យឆ្លើយខុសពីការពិត មានការដេញដោលគ្នាអ៊ីចឹងជាជាងសួរដាច់ដោយឡែកៗមិនបានបញ្ជាក់គ្នាទៅវិញទៅមក វាមានប្រយោជន៍ត្រង់ហ្នឹងឯង

ទោះយ៉ាងណាមេធាវីរូបនេះថាចៅក្រមមិនទាន់បានឆ្លើយតបបែបណានៅឡើយ។

ស្រី មុំ
នាង ខុម ចាន់តារ៉ាទី ហៅស្រីមុំ

នៅព្រឹកថ្ងៃព្រហស្បតិ៍នេះដែរព្រះរាជអាជ្ញារងលោក សៀង សុខ បានសួរនាង ខុម ចាន់តារ៉ាទី ហៅស្រីមុំ ដើម្បីសាកសួរបន្ថែមក្នុងដំណាក់កាលអយ្យការ។ ក្រោយបញ្ចប់ការសាកសួរប្រមាណជា៣ម៉ោង លោក គឹម វាសនា មេធាវីការពារក្ដីនាងស្រីមុំ បានឲ្យដឹងថាព្រះរាជអាជ្ញារងបានសាកសួរកូនក្ដីលោកលើករណីសញ្ចារកម្មពាក់ព័ន្ធនឹងលោក កឹម សុខា លោក ពិន រតនា និងលោក តុ វ៉ាន់ចាន់ ក្នុងនាមជាជនរងគ្រោះ។

លោកមានប្រសាសន៍ថា៖ «រឿងនេះគឺពិតហើយអត់មានកុហកទេ ចម្លើយនេះជាចម្លើយមែនទែនហើយអត់មានកុហកទេ វាជាចម្លើយពិតហើយតុលាការនឹងបន្តនីតិវិធីបន្តទៀត ខ្ញុំអត់អាចនិយាយបានលើសពីហ្នឹងទេ ព្រោះវាជារឿងសម្ងាត់ស៊ើបសួរ»។

គួរបញ្ជាក់ថាកាលពីថ្ងៃទី២ ខែឧសភា លោកស្រី លឹម មុនី និងមន្ត្រីអាដហុកបីរូបផ្សេងទៀតត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចឲ្យឃុំខ្លួនបណ្តោះសន្ននៅពន្ធនាគារព្រៃសទាក់ទងនឹងបទចោទសូកប៉ាន់សាក្សី។ ចំណែកអគ្គលេខាធិការរង គ.ជ.ប លោក នី ចរិយា ត្រូវបញ្ជូនទៅឃុំនៅមន្ទីរឃុំឃាំងនៃស្នងការដ្ឋាននគរបាលរាជធានីភ្នំពេញទាក់ទងនឹងការចោទប្រកាន់សមគំនិតក្នុងអំពើសូកប៉ាន់សាក្សីក្នុងសំណុំរឿងនាង ខុម ចាន់តារ៉ាទី ហៅស្រីមុំ ដែលត្រូវបានគេទម្លាយថាជាស្រីកំណាន់របស់លោក កឹម សុខា៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ