មេដឹកនាំមីយ៉ាន់ម៉ា លោកស្រី អ៊ុង សានស៊ូជី អំពាវនាវឲ្យសហរដ្ឋអាមេរិកបង្កើនការវិនិយោគលើប្រទេសលោកស្រី បន្ទាប់ពីលោក អូបាម៉ា បានសន្យាដកទណ្ឌកម្មសេដ្ឋកិច្ចនៅពេលខាងមុខ។
លោកស្រី អ៊ុង សានស៊ូជី ថ្លែងក្នុងពេលដែលោកស្រីទៅបំពេញទស្សនកិច្ចនៅសហរដ្ឋអាមេរិកថា ការវិនិយោគពីអន្តរជាតិជាផ្នែកសំខាន់ក្នុងការជួយដល់កំណើនសេដ្ឋកិច្ចជាតិនិងជួយដល់ប្រជាជនមីយ៉ាន់ម៉ាជាង៥០លាននាក់។ លោកស្រីថាការជួយសេដ្ឋកិច្ចមីយ៉ាន់ម៉ានេះក៏ជាផ្នែកមួយសំខាន់ក្នុងការពង្រឹងលទ្ធិប្រជាធិបតេយ្យនៅក្នុងប្រទេសនេះផងដែរ។ នេះបើតាមទីភ្នាក់ងារសារព័ត៌មានរ៉យទ័រ។
កាលពីថ្ងៃពុធសប្តាហ៍នេះលោក អូបាម៉ា បានថ្លែងប្រាប់លោកស្រី អ៊ុង សានស៊ូជី ថាអាមេរិកកំពុងតែរៀបចំក្នុងការដកទណ្ឌកម្មសេដ្ឋកិច្ចចេញពីប្រទេសមីយ៉ាន់ម៉ា ហើយជួយពង្រឹងសេដ្ឋកិច្ចដល់ប្រទេសដែលទើបធ្វើកំណែទម្រង់ចេញពីរបបយោធាមករបបលទ្ធិប្រជាធិបតេយ្យវិញនេះ។
លោកស្រី អ៊ុង សានស៊ូជី ថ្លែងថាការជោគជ័យលើសេដ្ឋកិច្ចគឺជាផ្នែកមួយសំខាន់ក្នុងការលើកទឹកចិត្តមនុស្សគ្រប់គ្នាក្នុងប្រទេសមីយ៉ាន់ម៉ារួមទាំងពួកយោធាផង ឲ្យជ្រើសរើសយកការដឹកនាំតាមបែបលទ្ធិប្រជាធិបតេយ្យ៕
