ព្រឹទ្ធសភាហ្វីលីពីនបើកសវនាការពិសេសមួយកាលពីថ្ងៃព្រហស្បតិ៍ម្សិលមិញសាកសួរសាក្សីជុំវិញករណីប្រធានាធិបតី រ៉ូឌ្រីហ្គូ ឌូតឺតេ បោះមនុស្សឲ្យក្រពើស៊ីនិងការសម្លាប់មនុស្សក្រៅច្បាប់ផ្សេងៗទៀត។
សាក្សីឈ្មោះ Edgar Matobato អាយុ៥៧ឆ្នាំ ថ្លែងថាលោកជាមនុស្សម្នាក់ក្នុងចំណោមអ្នកផ្សេងទៀតដែលជាអ្នកត្រូវគេចាត់ឲ្យសម្លាប់មនុស្សនៅក្នុងទីក្រុងដាវ៉ៅ នៅពេលដែលលោក ឌូតឺតេ ធ្វើជាអភិបាលក្រុងនោះមុនឡើងតំណែងជាប្រធានាធិបតីកាលពីខែឧសភា។ លោក Matobato ថ្លែងពេលនេះស្របពេលដែលព្រឹទ្ធសភា កំពុងស្រាវជ្រាវកំហុសរបស់លោក ឌូតឺតេ ជុំវិញការសម្លាប់មនុស្សជាង៣០០០នាក់ក្រៅប្រព័ន្ធច្បាប់ ក្រោមហេតុផលថាយុទ្ធនាការប្រឆាំងការជួញដូរគ្រឿងញឿន។ នេះបើតាមការចុះផ្សាយរបស់ Washington post។
Washington Post ចុះផ្សាយទៀតថា ក្នុងចំណោមមនុស្សរាប់ពាន់នាក់ដែលស្លាប់ដោយសារសង្គ្រាមថ្នាំញៀនរបស់លោក ឌូតឺតេ នេះក៏មានក្មេងស្រីម្នាក់អាយុ៥ឆ្នាំផងដែរ។
សាក្សីអះអាងថាពេលនៅក្រោមការគ្រប់គ្រង លោក ឌូតឺតេ ជាអភិបាលក្រុង ក្រុមពេជ្ឈឃាតត្រូវបានគេបញ្ជាឲ្យសម្លាប់មនុស្សរាប់ពាន់នាក់យកទៅឲ្យក្រពើស៊ីនិងយកសាកសពចោលក្នុងសមុទ្រ៕
