សារព័ត៌មានអូស្ត្រាលីបានរាយការណ៍ថា យន្តហោះមួយគ្រឿងរបស់ក្រុមហ៊ុន AirAsia ដែលហោះហើរពីទីក្រុង Perth ប្រទេសអូស្ត្រាលី ឆ្ពោះទៅកាន់ទីក្រុងបាលីប្រទេសឥណ្ឌូនេស៊ីនោះ បានធ្លាក់ចុះពីគន្លងហោះហើររបស់ខ្លួនដល់ទៅជាង ៦គីឡូម៉ែត្រភ្លាមៗ ក្រោយពីវាហោះឡើង កាលពីព្រឹកថ្ងៃម្សិលមិញនេះ ដោយបណ្ដាលឲ្យអ្នកដំណើរភ័យតក់ស្លុត។
សារព័ត៌មាន The Sydney Morning Herald បានផ្សាយថា យន្តហោះ AirAsia ជើងហោះហើរ QZ ៥៣៥ ដែលផ្ទុកមនុស្ស ១៤៥នាក់នោះ ត្រូវបង្ខំចិត្តបើកត្រឡប់ក្រោយវិញ តែ ២៥នាទីប៉ុណ្ណោះក្រោយពីយន្តហោះនោះស្ថិតក្នុងគន្លងហោះហើររបស់ខ្លួន បន្ទាប់ពីអាកាសយានិករបស់យន្តហោះនេះ បានផ្ដល់សញ្ញាអំពីការធ្លាក់ចុះនៃសម្ពាធនៅក្នុងតួយន្តហោះ។
សារព័ត៌មាននេះបន្ថែមថា បញ្ហាបច្ចេកទេសមួយ បានបង្កឲ្យយន្តហោះនោះបាត់បង់លំនឹងរបស់វា ដោយបានធ្លាក់ចុះពីកម្ពស់ជាង ៩គីឡូម៉ែត្រ មកនៅកម្ពស់ជាង ៣គីឡូម៉ែត្រពីផែនដី ដោយពុំមានសញ្ញាព្រមានណាមួយនោះឡើយ។
ក្រុមអ្នកដំណើរនៅលើយន្តហោះនោះ បានថតវីដេអូតាមទូរស័ព្ទដៃរបស់ពួកគេអំពីហេតុការណ៍នោះដែលត្រូវបានគេទម្លាយចេញ ខណៈដែលម៉ាស់ដកដង្ហើម បានធ្លាក់ចុះ ហើយអ្នកដំណើរខ្លះបានឱបមនុស្សជាទីស្រឡាញ់របស់ពួកគេទាំងភ័យរន្ធត់។
អ្នកដំណើរដទៃទៀតនៅលើយន្តហោះនោះ បានប្រាប់ថា ពួកគេបានផ្ញើសារប្រាប់ទៅសាច់ញាតិរបស់ពួកគេ ដោយព្រួយបារម្ភថា ពួកគេអាចនឹងបាត់បង់ជីវិត។
ទូរទស្សន៍ ABC របស់អូស្ត្រាលី បានផ្សាយថា អាកាសយានិក បានបញ្ជាយន្តហោះនោះត្រឡប់ក្រោយវិញ ហើយក្រុមជួយសង្គ្រោះបន្ទាន់ ត្រូវបានដាក់ឲ្យត្រៀមខ្លួន នៅឯព្រលានយន្តហោះទីក្រុង Perth។
ទូរទស្សន៍នេះ រាយការណ៍បន្ថែមថា ភាពច្រួលច្របល់នៅលើយន្តហោះនោះ កាន់តែអាក្រក់ថែមទៀតសម្រាប់អ្នកដំណើរមួយចំនួន ខណៈដែលសេចក្ដីប្រកាសនៅលើយន្តហោះនោះ មិនត្រូវបានធ្វើឡើជាភាសាអង់គ្លេសនោះទេ។
ក្រុមហ៊ុន AirAsia បានថ្លែងសុំទោសសម្រាបហេតុការណ៍ដ៏ភ័យតក់ស្លុតនោះ ហើយថា យន្តហោះនោះ បានចុះចតដោយសុវត្ថិភាពនៅឯព្រលានយន្តហោះអន្តរជាតិ Perth នៅម៉ោង ១២ និង ៤០នាទីរសៀល ម៉ោងនៅក្នុងប្រទេសអូស្ត្រាលី៕