តុលាការសម្រេចមិនឃុំខ្លួនសកម្មជនដីធ្លីចំនួន៧នាក់ដែលរងការចោទថា បានដុតគ្រឿងចក្ររបស់ក្រុមហ៊ុនមួយក្នុងខេត្តពោធិ៍សាត់ នៅក្នុងជម្លោះដីធ្លីកាលពីជិត១០ឆ្នាំមុន។
ក្នុងដីកាកោះចុះថ្ងៃទី២៥ ខែតុលា តំណាងអយ្យការអមសាលាដំបូងខេត្តពោធិ៍សាត់ លោក ឆាយ ហុង បានកោះហៅពលរដ្ឋមានជម្លោះចំនួន ៧នាក់ មានលោក ឡាច សារ៉ាន់ លោក ចែម ដារ៉ា និងពលរដ្ឋ ៥នាក់ទៀតរស់នៅស្រុកក្រគរ ឲ្យចូលបំភ្លឺនៅថ្ងៃនេះ តាមបណ្តឹងរបស់ក្រុមហ៊ុនភាពីម៉ិច ដែលបានប្តឹងតាំងពីឆ្នាំ២០១១ ដោយចោទថា ធ្វើឲ្យខូចខាតដោយចេតនា។
ពលរដ្ឋម្នាក់ក្នុងចំណោម៧នាក់ដែលរងបណ្តឹងដែរ លោក ឡាច សារ៉ាន ប្រាប់វីអូឌីក្រោយចេញពីសាលាដំបូងខេត្តពោធិ៍សាត់ថា តុលាការមិនបានឃាត់ខ្លួនគាត់នោះទេ បន្ទាប់ពីសាកសួររួច។
លោកបន្តថា តុលាការបានសាក់សួរគាត់ជុំវិញការដុតគ្រឿងចក្ររបស់ក្រុមហ៊ុនដែលបានកើតឡើងកាលពីឆ្នាំ២០១០ ហើយលោកបានឆ្លើយបដិសេធថា គាត់មិនបានប្រព្រឹត្តដូចការចោទប្រកាន់របស់ក្រុមហ៊ុននោះទេ។
លោកបន្ថែមថា «គេសួរថា យើងបានទៅបានទៅដុតបំផ្លាញគ្រឿងចក្រក្រុមហ៊ុនមែនអត់? ហើយយើងមានដីនៅកន្លែងហ្នឹងអត់? មានដែលធ្លាប់ចូលតវ៉ាអត់? ហើយខ្ញុំឆ្លើយថា ខ្ញុំអត់មានដីផង ហើយខ្ញុំក៏អត់ទៅវាយបំផ្លាញគ្រឿងចក្រគេដែរ។ តុលាការគេឲ្យចេញ ហើយគេនឹងប្រកាសសាលក្រមនៅថ្ងៃ២៩ខាងមុខនេះ»។
សកម្មជនដីធ្លីដែលរងបណ្តឹងម្នាក់ទៀតលោក ចែម ដារ៉ា ឲ្យដឹងថា ក្រោយសាកសួរតុលាការមិនបានឃាត់ខ្លួនពលរដ្ឋណាម្នាក់នោះទេ ហើយថា រូបលោក និងពលរដ្ឋផ្សេងទៀតដែលរងបណ្តឹងនោះ បានសំណូមពរទៅតុលាការឲ្យទម្លាក់ចោលការចោទប្រកាន់។
លោកបន្ថែមថា៖ «ពួកយើងទាំង៧នាក់ហ្នឹង បានសំណូមពរដូចៗ ឲ្យខាងតុលាការហ្នឹងទម្លាក់ការចោទប្រកាន់ហ្នឹងចោលទៅ ព្រោះពួកខ្ញុំទាំង៧នាក់នេះមិនបានប្រព្រឹតខុសទេ ព្រោះយើងអត់បានខូចខាត់បោះគេ»។
វិអូឌីមិនអាចសុំភាគីក្រុមហ៊ុន និងតំណាងតំណាងយ្យការអមសាលាដំបូងខេត្តពោធិ៍សាត់លោក ឆាយ ហុង ដើម្បីសុំបញ្ជាក់បន្ថែមលើរឿងនេះបានទេ។
មន្រ្តីអង្គការលីកាដូប្រចាំខេត្តពោធិ៍សាត់ លោក អេង ឈុនហាន ដែលតាមដានករណីនេះ មានប្រសាសន៍ថា តុលាការគួរតែបញ្ចប់សុំណុំរឿងនេះ កុំមានការចោទប្រកាន់ ដោយលោកថា តាមស្រាវជ្រាវ ពលរដ្ឋទាំង៧នាក់នោះមិនមានកំហុសដូចការចោទប្រកាន់របស់ដើមបណ្តឹងនោះទេ។
លោកបន្ថែមថា៖ «ពួកគាត់ទាំងអស់គ្នាហ្នឹងមិនមានពាក់ព័ន្ធក្នុងបទល្មើសដូចក្នុងការចោទប្រកាន់ទេ ដោយសារយើងបានទៅជួបសាក្សីៗ គាត់បានបញ្ជក់ពីពេលវេលា ពីអង្គហេតុដែលកើតឡើងហ្នឹង វាផ្ទុយពីការចោទប្រកាន់ ដោយពួកគាត់ហ្នឹង គាត់អត់បានដឹងទេ។ អញ្ចឹងជាទស្សនៈ យើងសុំទទូចឲ្យលោកចៅក្រម លោកមេត្តាពិចារណា និងជួយរកយុត្តិធម៌ដល់អ្នកដែលស្លូតត្រង់ បើសិនជាលោកអាចថ្លឹងថ្លែងអាចបិទករណីហ្នឹងបាន យើងសារទរនឹងរឿងហ្នឹង»។
កាលពីឆ្នាំ២០១០ ពលរដ្ឋចំនួន ៦ភូមិ នៅក្នុងស្រុកគគរ មានជម្លោះដីធ្លីជាមួយក្រុមហ៊ុនភាពីម៉ិច ក្រោយពីក្រុមហ៊ុននេះទទួលបានគម្រោងដីសម្បទានសេដ្ឋកិច្ចនៅទីនោះ។ ពលរដ្ឋថា កាលណោះ ក្រុមហ៊ុមបានឈួសឆាយប៉ះពាល់ដីធ្លីពួកគាត់រាប់រយហិកតា ដែលធ្វើឲ្យក្រុមអ្នកភូមិផ្ទុះការតវ៉ា៕