លោកនាយករដ្ឋមន្ត្រី ហ៊ុន សែន បានជួបសំណេះសំណាលជាមួយក្រុមកម្មករកម្មការិនីនៅតំបន់ស្រុកខ្សាច់កណ្ដាល នៅព្រឹកថ្ងៃនេះ តែមួយថ្ងៃប៉ុណ្ណោះបន្ទាប់ពីលោកវិលត្រឡប់ពីកិច្ចប្រជុំកំពូលអាស៊ាន។
ទំព័រហ្វេសប៊ុករបស់លោក លោកនាយករដ្ឋមន្ត្រី ហ៊ុន សែន បានរៀបរាប់ថា លោកកំពុងជួបសំណេះសំណាលជាមួយក្រុមកម្មករកម្មការិនីជាង ១ម៉ឺននាក់ នៅតំបន់រោងចក្រ 7NG ដែលស្ថិតនៅក្នុងស្រុកខ្សាច់កណ្ដាល។
ដូចទៅនឹងជំនួបសំណេះសំណាលមុនៗដែរ លោក ហ៊ុន សែន ចាប់ដៃជាមួយប្រជាពលរដ្ឋ និងបានថតរូបជាមួយក្រុមកម្មករកម្មការិនីទាំងនោះ។
លោក ហ៊ុន សែន បានចាប់ផ្ដើមដំណើរចុះជួបជាមួយក្រុមកម្មករកម្មការិនីឡើងវិញ តែមួយថ្ងៃប៉ុណ្ណោះ បន្ទាប់ពីលោកវិលត្រឡប់ពីកិច្ចប្រជុំកំពូលអាស៊ានរយៈពេល ៣ថ្ងៃ នៅប្រទេសហ្វីលីពីន។
លោកនាយករដ្ឋមន្ត្រី បានកំណត់ថ្ងៃចុះជួបសំណេះសំណាលនៅតាមរោងចក្រដោយផ្ទាល់នៅរៀងរាល់ថ្ងៃពុធ និងជួបសំណេះសំណាលនៅមជ្ឈមណ្ឌលកោះពេជ្រ នៅរៀងរាល់ថ្ងៃអាទិត្យ៕