រដ្ឋបាលថ្មីរបស់ប្រធានាធិបតី ដូណាល់ ត្រាំ និងចាប់ផ្តើមវាយតម្លៃឡើងវិញ នូវការអនុវត្តរបស់ប្រទេសនាំចូលទៅសហរដ្ឋអាមេរិក ដែលទទួលបានប្រព័ន្ធអនុគ្រោះពន្ធ GSP ដើម្បីឲ្យប្រាកដថាប្រទេសទាំងនោះបានបំពេញតាមលក្ខខណ្ឌរបស់ខ្លួន។ នេះដោយយោងតាមសេចក្តីប្រកាសព័ត៌មានរបស់តំណាងការិយាល័យពាណិជ្ជកម្មសហរដ្ឋអាមេរិក។
ប្រព័ន្ធអនុគ្រោះពន្ធទូទៅរបស់សហរដ្ឋអាមរិក ឬ GSP គឺជាកម្មវិធីអនុគ្រោះពន្ធពាណិជ្ជកម្ម ដោយមិនមានការបង់ពន្ធសម្រាប់ការនាំចូលទំនិញ ពីប្រទេសកំពុងអភិវឌ្ឍន៍ និងប្រទេសក្រីក្រទៅកាន់សហរដ្ឋអាមេរិក។ ប្រទេសកម្ពុជាបានទទួលប្រព័ន្ធអនុគ្រោះពន្ធនេះតាំងពីឆ្នាំ១៩៩៧។
ក្នុងសេចក្តីប្រកាសព័ត៌មានចេញផ្សាយកាលពីខែតុលា ដែលវីអូឌីទើបទទួលបាន ឲ្យដឹងថា ភ្នាក់ងារតំណាងពាណិជ្ជកម្មសហរដ្ឋអាមេរិក នឹងចាប់ផ្តើមចុះវាយតម្លៃ និងពិនិត្យឡើងវិញទៅលើប្រទេសទាំងអស់ ដែលទទួលបានការអនុគ្រោះព័ន្ធ GSP នេះ ក្នុងរយៈពេល៣ឆ្នាំ ដោយចាប់ផ្តើមពីប្រទេសនៅតំបន់អាស៊ីមុនគេ។
អ្នកតំណាងការិយាល័យពាណិជ្ជកម្មអាមេរិក លោក Robert Lighthizer ត្រូវបានគេដកស្រង់សំដីថា ប្រទេស ដែលទទួលបានអត្ថប្រយោជន៍ពីអាមេរិក ត្រូវតែបំពេញតាមលក្ខណៈវិនិច្ឆ័យដែលបង្កើតឡើងដោយសភាអាមេរិក។
លោកថា៖ «តាមរយៈការបង្កើតដំណើរការកាន់តែប្រសើរឡើងដើម្បីវាយតម្លៃលើប្រយោជន៍របស់ប្រទេសទទួលផល សហរដ្ឋអាមេរិកអាចធានាថាបណ្តាប្រទេសនោះមិនដើរតាមវិធានដែលមិនទទួលបានចំណាប់អារម្មណ៍ពាណិជ្ជកម្មអាមេរិក។ ការកំណត់នេះ ជាការកំណត់តុល្យភាពត្រឹមត្រូវសម្រាប់ប្រព័ន្ធមួយដែលជួយលើកកម្ពស់កំណែទម្រង់សេដ្ឋកិច្ចនៅក្នុងបណ្តាប្រទេសកំពុងអភិវឌ្ឍនិងសម្រេចបាននូវយុទ្ធិការស្មើគ្នាសម្រាប់អាជីវកម្មអាមេរិក»។
អគ្គលេខាធិការរងសមាគមរោងចក្រកាត់ដេរហៅកាត់ថា GMAC លោក កាំង ម៉ូលីកា មានប្រសាសន៍ថា វាគឺជាការវិវឌ្ឍន៍ទៅលើការរំពឹងរបស់ GMAC លើផលិតផលស្បែកជើង ដែលសមាគមបានដាក់ស្នើកាលពីពេលថ្មីៗនេះ។ លោក រំពឹងថា សហរដ្ឋអាមេរិកនឹងនៅតែបន្តអនុគ្រោះពន្ធ GSP សម្រាប់កម្ពុជាបន្តទៀត។
លោកថា៖ «ការពិតទៅ វាជាឆន្ទៈទាំងស្រុងរបស់រដ្ឋាភិបាលសហរដ្ឋអាមេរិក តែយ៉ាងណាក៏ដោយបើយើងពិនិត្យមើលទៅលើ ចំណុចសំខាន់ ដែលអាចយកមកធ្វើជាលក្ខណៈវិនិច្ឆ័យក្នុងការផ្តល់ឲ្យ GSP នោះគឺការគោរពលក្ខខណ្ឌការងារ និងសិទ្ធិការងារ។ ហើយកន្លងមក កម្ពុជាយើងអនុវត្តបានល្អនៅក្នុងផ្នែកនេះ។ វាជាចំណុចវិជ្ជមានមួយ ដែលគួរពិចារណារបស់រដ្ឋាភិបាលសហរដ្ឋអាមេរិក»។
បើតាមសេចក្តីប្រកាសនោះ ដើម្បីមានលក្ខណៈសម្បត្តិគ្រប់គ្រាន់សម្រាប់ ទទួលបាននូវការអនុគ្រោះពន្ធGSP ប្រទេសទទួលផលប្រយោជន៍នេះត្រូវតែមានលក្ខណៈវិនិច្ឆ័យសិទ្ធិទទួលបាន ១៥ ដែលបានបង្កើតឡើងដោយសភា រួមទាំងការគោរពសេចក្តីបង្គាប់អាជ្ញាកណ្តាល ឬសាជីវកម្មអាមេរិក ការប្រយុទ្ធប្រឆាំងនឹងពលកម្មកុមារ ការគោរពសិទិ្ធកម្មករដែលត្រូវបានទទួលស្គាល់ជាអន្តរជាតិ ការការពារកម្មសិទ្ធិបញ្ញា និងផ្តល់ត្រលប់មកសហរដ្ឋអាមេរិកនូវលទ្ធភាពទទួលបានពីទីផ្សារសមធម៌ និងសមហេតុផល៕