ពលរដ្ឋខ្មែររស់នៅអាមេរិកបានដាក់ពាក្យបណ្ដឹងទៅតុលាការសហរដ្ឋអាមេរិកដោយសុំឲ្យក្រុមហ៊ុនប្រេង Chevron បញ្ចេញវីដេអូ ករណីឃាតកម្មលើអ្នកវិភាគបញ្ហាសង្គម លោក កែម ឡី។
យោងតាមហ្វេសប៊ុកលោក សម រង្ស៊ី ចេញផ្សាយថ្ងៃសុក្រនេះ ឲ្យដឹងថា ពលរដ្ឋខ្មែរនៅអាមេរិកបានដាក់ពាក្យបណ្ដឹងនៅតុលាការក្នុងរដ្ឋកាលីហ្វញ៉ា សហរដ្ឋអាមេរិក ដោយស្នើក្រុមហ៊ុនប្រេង Chevron ដែលមានទីស្នាក់ការនៅទីក្រុង San Ramon (រដ្ឋ California) និងជាម្ចាស់ក្រុមហ៊ុនប្រេងកាល់តិច ឲ្យបញ្ចេញវីឌីអូ ពីកាមេរ៉ាសុវត្ថិភាព ពេលមានករណីឃាតកម្មលើលោក លោក កែម ឡី។ ពួកគេក៏បានទាមទារឲ្យបង្ហាញវីឌីអូទាំងមុន និងក្រោយការបាញ់សម្លាប់នេះ ព្រមទាំងការឆ្លើយឆ្លងគ្នារវាងមន្ដ្រីរដ្ឋាភិបាលកម្ពុជា និងបុគ្គលិកក្រុមហ៊ុនប្រេង Chevron និងក្រុមហ៊ុនកាល់តិចថែមទៀតផង។
ពលរដ្ឋដែលដាក់ពាក្យបណ្ដឹងនេះ គឺជាក្រុមអ្នកដែលបានដាក់ពាក្យប្រឆាំងរដ្ឋាភិបាលកម្ពុជាទៅតុលាការព្រហ្មទណ្ឌអន្ដរជាតិ (ICC) កាលពីពេលកន្លងទៅ ពាក់ព័ន្ធរឿងរំលោភសិទ្ធិមនុស្ស និងការធ្វើទុក្ខបុកម្នេញលើសកម្មជនប្រឆាំងផ្សេងទៀត។
អស់រយៈពេល៥ខែមកហើយដែលលោក កែម ឡី អ្នកបញ្ហាសង្គមដ៏ល្បីត្រូវបានខ្មាន់កាំភ្លើងបាញ់សម្លាប់នៅស្ដារម៉ាតក្បែរស្ដុបបូកគោកណ្ដាលទីក្រុងភ្នំពេញ កាលពីថ្ងៃទី១០ ខែកក្កដា ឆ្នាំ២០១៦។ មានជនជាប់ចោទមួយរូបប៉ុណ្ណោះ ដែលមានឈ្មោះ អឿត អាង ឬហៅ ជួប សំលាប់ ត្រូវបានឃុំខ្លួនបន្តការស៊ើបអង្កេតដោយតុលាការក្រុងភ្នំពេញ។
បើតាមហ្វេសប៊ុកលោក សម រង្ស៊ី ឲ្យដឹងទៀតថា មកទល់នឹងពេលនេះ ក្រុមហ៊ុនប្រេង Chevron មិនព្រមផ្ដល់ភស្ដុតាងអ្វីទាល់តែសោះតាមការស្នើសុំនោះ៕
