រដ្ឋាភិបាលអូស្ត្រាលី ម៉ាឡេស៊ី និងចិន បានប្រកាសនៅថ្ងៃនេះថា ការស្រាវជ្រាវនៅសមុទ្រទឹកជ្រៅដើម្បីស្វែងរកយន្តហោះបាត់ខ្លួន MH370 នោះ ត្រូវបានផ្អាកហើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានមើលសេចក្ដីប្រកាសរួមរបស់រដ្ឋាភិបាលប្រទេសទាំងបី។
យន្តហោះម៉ាឡេស៊ី MH370 បានបាត់ខ្លួនអំឡុងពេលហោះហើរពីទីក្រុងគួឡាឡំពួ ទៅកាន់ទីក្រុងប៉េកាំង កាលពីថ្ងៃទី៨ ខែមីនា ឆ្នាំ២០១៤កន្លងមក ដោយផ្ទុកអ្នកដំណើរ និងបុគ្គលិកសរុប ២៣៩នាក់។
សេចក្ដីប្រកាសព័ត៌មានរួមរបស់រដ្ឋាភិបាលប្រទេសទាំងបី បាននិយាយថា គេមិនបានរកឃើញយន្តហោះនោះឡើយ នៅអំឡុងស្វែងរកលើផ្ទៃទឹកទំហំ ១២ម៉ឺនគីឡូម៉ែត្រការ៉េ នៅភាគខាងត្បូងមហាសមុទ្រឥណ្ឌា។
សេចក្ដីប្រកាសព័ត៌មាននិយាយថា រហូតមកដល់បច្ចុប្បន្ននេះ គ្មានព័ត៌មានណាត្រូវបានគេរកឃើញដើម្បីកំណត់ពីទីតាំងជាក់លាក់នៃយន្តហោះនោះឡើយ។ អាស្រ័យហេតុនេះ ការស្វែងរកយន្តហោះ MH370 នៅដែនសមុទ្រ ត្រូវបានផ្អាក។
ក្រុមអ្នកស៊ើបអង្កេត រហូតមកដល់ពេលនេះ បានបញ្ជាក់ថា បំណែក ៣ចំណែក ដែលត្រូវបានគេរកឃើញនៅឆ្នេរភាគខាងលិចនៃមហាសមុទ្រឥណ្ឌា គឺជាបំណែករបស់យន្តហោះ MH370។
ចំណែកបំណែកដទៃទៀត ដែលភាគច្រើនបានមកពីឆ្នេរភាគខាងលិចនៃមហាសមុទ្រឥណ្ឌា សុទ្ធតែត្រូវបានបញ្ជាក់ដូច្នេះដែរ បើទោះបីជាវាមិនប្រាកដជាក់លាក់ក៏ដោយ៕
